Ngat 41 tylli ki dukan ha ka jingkhynra kyndit ka KHADC ha Iewduh

Shillong,29 Jymmang:
Ka Khasi Hills Autonnomous District Council lyngba ka tnad ba peit laisen dkhar, mynta ka sngi ka la pynlong ia ka jingleit khynra kaba kyndit kyndit ha Iewduh. Katei ka jingleit khynra ka long ban khang ia kito ki dukan ki bym don laisen khaii bad kumjuh ruh ki bym pynthymmai shuh ia ki License jong ki.
Ha katei ka jingleit khynra kaba kyndit kyndit da ki pulit ka KHADC ba la ialam da u Superitendent ka Enforcement u bah Poland Sohphoh, tad haduh ba thoh ia kane ka khubor ki la don haduh 37 tylli ki dukan kiba la shah khang dam noh, na ki 41 tylli kiba ka KHADC ka lap ba kim biang kot biang sla.
Ki la don haduh kumba 70 ngut tam ki pulit ka KHADC, kiba la ia phiah la ka jong ka jong ka kynhun ban klang sha baroh ki bynta ka Iewduh ban khang ia kitei ki dukan shuwa ba ki trai dukan bar jylla kin ioh phet krad. Wat la ka jingleit khynra ka long kaba kyndit kyndit, hynrei ki la don napdeng ki bar jylla kiba la ioh jingtip bad ki la khang hi ia ka dukan jong ki shuwa ba ki pulit KHADC kin wan ban khang, ha katei ka jingleit khynra ki la don ruh ki dukan kiba dang lait, namarba ki trai ki la khang dukan shuwa ban poi katei ka kynhun ki Enforcement. Ha ka por 10:30 baje mynstep, ka por ba la antad ba baroh ki dukan ki la plie lut, ki pulit KHADC kiba la ialum lymbung ha phyllaw ka District Council ki la ia mih khrui bad tur beit beit sha Iewduh. La iohi ba ha katei ka jingleit khynra ki la don bun jait ki dukan kiba die ia ki jingdie bapher bapher kiba la sei la ki mar shabar ban ioh die, hynrei la hukum ba kin thep noh shapoh bad ki bor KHADC ki la khang noh ia ki.
Ha Iew Mawlong ki pulit KHADC ki la ioh ban khang ia ka dukan tiar jong u Akshay Sharma, ha kaba u trai dukan um pat don ha dukan bad ki don tang ki nong bylla, ha basa jhur ki la ioh ban khang ia ka dukan u Shambhu Singh, utei u dang bun kam bha ha katei ka por ban die jhur bad ban wanrah ia ki mar ba u thied madan, ki la ioh khang ruh ia kawei ka dukan die Carpet ha khlieh iew, hajan basa ktung. Katei ka jingleit khynra kaba kyndit ka la pynlyngngoh ia baroh ki paidbah nongshong iew, kiba la shu ang lyngngoh ha ka por ba ki pulit jong ka District Council ki la wan ban khynra ha ki dukan bar jylla.