Ngan ym phiah ia ka Assam, ong U Tarun Gogoi

Guwahati,9 Nailar:
U Myntri Rangbah ka assam u Tarun Gogoi u la kyniait ia ki jingdawa jylla jong ki seng bapher bapher ha Assam da kaba ong ba baroh ki kynhun ha Assam ki dei ban ia long. “Ngan ym phiah ia ka jylla Assam, ngi donkam ban ia long tylli, Sangeh ia ki jing pakhang shnong leit sha la ki jong ki kam” byrngem u Tarun Gogoi.
“Lada ngi ia long kawei kiwei ki tieng ban pyrshang ban pynpait ia ngi, Kam pher la ngi dei ki Rabhas, Bodos, Karbis, Chutias, Gorkhas ne kino kino ki jaitbynriew rit paid hynrei ngi dei ban shong ia sah ryngkat kum ki nong Assam ha kajuh ka shatri jong ka jylla Assam naduh Sadiya shaduh Dhubri” ong biang u Tarun.
U la Tarun Gogoi u la pynpaw ia kitei ki kyntien ba ka jingia long kawei bad ka jingiashong ia sah ryngkat lang ka dei ka jingkhlain jong ka jylla bad ka long ruh kaba donkam tam ha ka jingialang sam khusnam Gyan Bikas Bota sha ki khynnah skul da ka Thengal Kachari Autonomous Council (TKAC) kaba long ka konstitwensi jong u ha Titabor.
“Ka jing pakhang shnong kam pynshitom ia kiba riewspah hynrei dei ki nongrep bad bad ki nongbylla sngi kiba mad ia ka jingshitom. Sangeh noh ka pakhang shnong leit sha la ki jong ki kam” khot u Myntri Rangbah ka assam ia ki paidbah.
Khlem da kren pyrshah ia ki jingja ia um snam kiba la jia ha ka jylla Assam namar ki jingiakhih dawa jylla , u Tarun u la kdew da kaba ong ba ka jingiaum snam kam lah ban wallam ia ka jingbha hynrei dei tang ka jingiakren kaba ialam sha ka jingia sngewthuh.
“Na ka liang ka sorkar Assam ngi dang pynlong ki jingiakren bad baroh bad ka Ulfa, NDFB, Dima Hasao Daogah bad kiwei pat ki kynhun lehnoh bad wat ki kynhun dawa jylla ruh kiba la dawa jylla Kamtapur, Karbi Anglong, Bodoland, bad kiwei, ngi dang leh kumjuh ban ia kren ban wanrah ia ka roi ka par, ka jingiatylli bad ka jingshongsuk hapoh ka shatri jong ka Assam -kum ki nong Assam” ong u Tarun Gogoi.
U la ong ruh ba la thaw haduh 18 tylli ki Autonomous Council ban peit ia ka roi ka par ha ki shnong ki thaw bad ban theh bun ki kam pynroi lyngba ki skhim bapher bapher “Ngi dang pyrshang mynta ban ia khun ban wanrah ia ka roi ka par ia ki jaitbynriew ba sahdien ha Assam, ym pat don jylla kaba leh kumba leh ma ngi” pynkut u Myntri Rangbah ka Assam.