“Ngan ym leit phai shuh da lei lei ruh”, ong U bah Latiplang ia ka KHNAM

Shillong, 10 Nailar:
U bah Latiplang Kharkongor, MDC ka KHNAM na Nongthym mai u la risain noh na katei ka seng kaba u don ka KHNAM, mynta ka 10 tarik u nailar. Katkum ka shithi risain u bah Latip kaba u la thoh sha u President/ General Secretary ka KHNAM u la ong ba ka daw ka jingrisain jong u ka dei na ka daw shimet jong u hi. Kane ka dei ka sien kaba ar kaba u bah Latiplang u la risain na ka seng KHNAM , kham mynshuwa u bah Latip u la mih noh na ka KHNAM, hynrei shuwa ka elekshon MDC 2014, u la wan phai biang sha katei ka seng bad tang hadien kumba ar snem u la mih biang. Haba kren sha ki nongthohkhubor mynta ka sngi u bah Latip u la ong ha kane ka sien kaba mynta um tharai shuh ban dang leit phai sha ka KHNAM, “Ngan ym leit phai shuh da lei lei ruh” u la ong. U bah Latiplang u la ong ba mynta un long beit kum u MDC shimet bad un ym pat ia soh bad kano kano ka seng sain pyrthei ruh.
Wat la u la pynpaw ba ka jingrisain jong u ka dei na ka daw shimet jong u hi , hynrei haba ki nongthohkhubor ki la tih bniah bha, katkum ka jingiathuh jong u la sngewthuh ba ka daw hi ka dei namar ba ki nongialam ka KHNAM ki la wad daw ia u namar ka jingleit iaid ryngkat ryngkat jong u bad u bah Ardent M Basaiawmoit ha kiba bun ki jingialang khamtam ha ka jingleit tur Secretariat ki paidbah dang shen.
U bah Latiplang u la ong ba ki nongialam ka KHNAM, ki la maham ia u ba um dei ban pyndonkam bakla ia ka kyrteng jong ka KHNAM haba u shim ia kano kano ka sienjam ia khih bad kiwei pat ki kynhun. Utei u MDC ka Nongthymmai u la kdew ba ka daw ka jingleit mih ryngkat jong u bad u bah Ardent, ka dei namar ba wat la u la tynruh na ka por sha ka por ia ki nongialam ka KHNAM naduh ka por ba u bah Adelbert Nongrum, Working President u dang long u CEM ka KHADC, hynrei u la ong ba ym shym la don kiba sngap ia ka jingkren jong u.
“Kam dei ba nga kyrshan ia u bah Ardent hynrei ka dei ka jingkyrshan ia ka ishu kaba ia khih pyrshah ia ka jingkyntur pud ka MUDA, ym don kynhun da kawei pat, ka KHNAM ka ioh thiah lyngngai bad dei na kata ka daw nga leit snohkti lang bad ka kynhun u bah Ardent, ka konstitwensi jong nga ruh ka dei ka konstitwensi kaba shah ktah ha katei ka jingwan kyntur pud ka MUDA” ong u bah Latiplang Kharkongor. U bah Kharkongor u la iathuh ruh ba ki la don bun ki jingai jingmut jong u ia ka KHNAM ha kaba ia dei bad ka ishu jong ka jaitbynriew , hynrei ka KHNAM kam shym la pynshah ia ki shkor jong ka tang khyndiat ruh ia ki jingkren jong u.