![](https://www.urupang.com/wp-content/uploads/2023/06/DSC00682-6.jpg)
Shillong:”Ka jingwan jongnga ban ïatrei lang sha ka Liang synshar hapoh KHA DC ka long ban ïohi ba u CEM ba thymmai u Bah Pynïaid Sing Syiem u la kular ban leit jngoh ïa kiba shong ha khappud ka Kon stitwensi jong nga, watla kum u MDC nga la jingpyrshang ban kren ïa ki mat, kham tam u pud u sam bad bunsien nga la rah, hynrei nga sngewdiaw ba la kular hapoh ka House ha kine ki saw snem ba la leit, ban kyrpad ba kin leit jngoh ïa ki nongshong shnong kiba sah ha u pud u sam, hynrei ha kine ki 4 snem ba la leit ym don kiba wan bad neh tang ha ki jingkular. Kumta nga la rung hapoh ka EC naba la kular ba 2 taïew hadien ba la thaw ïa ka EC yn leit ban jngoh ïa ki jaka u pud u sam,” ong u Deputy Chairman ba thymmai ka KHADC u Bah Charles Marngar haba kren bad ki nongthoh khubor.
U la ong ba lada kane ka jingkular kan urlong shisha kan long ka khubor sha ki paidbah ba la dei u MDC uba kmen tam ha ka samoi treikam jong u.
“Ngi don hangne ban ïada ïa ka khyndew ka shyiap, ki riti distur bad khamtam mynta hapoh ka Liang synshar ki don ki dkhot kiba la ih bha. Nga dei uwei na ki dkhot ka Regional Committee ïa pynbeit pud ka ban long ha ka 23 tarik mynta u bnai, kumba la pyntip da u Bah Prestone Tynsong. Nga ngan don beit bad u paidbah bad ngin ym ailad ban duh ïa ka khyndew ka shyiap ban ïeng bad ka Synjuk ki Rangbah Shnong,” u la ong.
Haba kylli la ka seng Congress Kan leh kumno halor kane ka jingïatreilang hapoh KHADC u Bah Charles u la ong, “Kan sa don beit ka jingïakynduh bad kan don ka jingïapynbeit bad ka seng Congress namar ngi ïatreilang hapoh ka EC bad kan sa don beit ka jingshim rai, namar ka rukom treikam hapoh KHADC bad ha jylla ka ïapher.”
Phi don ban ong eiei?