|
Shillong: U kyrtong MDC ka UDP na Malki-Laitumkhrah u bah Antonio War, u la ong ba un iakhun beit ia kane ka elekshon MDC ha kane ka kynti, wat la ki don kiba pynsaphriang ia ki khubor hamsaia ba un nym ialeh shuh ia ka elekshon namar ka jingshitom.
Haba kren mynta ka sngi, u bah Antiono u la ong, “Nga pynthikna ba ngan iakhun ia kane ka elekshon MDC bad ngin thep kyrteng ha ka 7 tarik mynta u bnai”. U la ong biang, “Nga khlem ioh trei bha mynta, hynrei nga la don 15 snem kum u MDC bad nga shu shaniah ha ki nongkyrshan, ngin don ki jingialang nangne shakhmat”. U la ong ba ha kaba nyngkong, kiba haiing ki la ong ban nym ialeh namar ka jingbym khlain ka met, hynrei ki paidbah ki la tyrwa hi ba kin trei ma ki, bad un shong ha iing ruh kam lei lei. “Ka don ka jingong na kiba haiing hasem ban nym iakhun hynrei haba iakren bad ki paidbah, ki ong em, phi shong ha ing, ngin trei ma ngi bad nga sngew kmen hangne ba trei ki paidbah. Ngi la iashong ha ing ngi pdiang ia kane ka jingong ki paidbah”, la ong u bah Antonio. Ha kawei ka liang, u Senior Working president ka UDP u bah Bindo M Lanong u la pynshai ba ka jingpynsaphriang khubor jong kiba ialeh pyrshah ba u bah Antonio War um nym ialeh ia kane ka MDC elekshon, ka dei kaba shu thaw. U bah Bindo u la ong, “U bah Antonio u la nang koit na ka jingpang bad un iakhun beit ia kane ka elekshon bad un jop ruh na Malki-Laitumkhrah konstitwensi” . Lah ban kdew ba u bah Antonio un hap ban iakhun ia u kyrtong ka Congress u bah Joseph Fanin Lakadong uba dei u lok ka Kong Ampareen Lyngdoh ka MLA, nangta u bah Anthony Nongbri na ka NPP. U General Secretary ka UDP u Dr Jemino Mawthoh u la ong ba mynshwa ki la sngewsih hadien ba la ioh sngew ba shitom u bah Antonio, hynrei mynta ula koit, ha kaba u la lah ban ialap iakynduh ia ki paidbah. “Ki don kiba thmu ban ialam bakla ia u paidbah bad kum kane kam dei ban long”, u la ong. Ha kajuh ka por, u bah Bindo u la ong ba ka UDP kan iakhun ia kane ka elekshon MDC halor ki mat ban pynkhlain ia ki kashari shnong ban shim bishar ia ki kam tuh kam thiem kiba rit ba ria kum ka kam tuh syiar, tuh blang, iashoh na ka kam buaid tanglang bad kiwei. “Ia ki Kashari Shnong la ithuh da ka ain bad ngin pynkhlain ia kane”, la ong u bah Bindo. Kawei pat ka long ba ka UDP ka kwah ba ka ain khanglad kyntiap seng kan treikam noh ha District Council. |
