Shillong: U bah Sanbor Shullai, kandidet MP jong ka seng BJP, ula sei ia ka sur kaba khor bha mynta ka sngi, pyrshah ia ka CAB, ha kaba ula ong “Ia ka CAB, yn nym pyntrei kam satia, katba U bah Sanbor Shullai, u dang im. Ngan pyniap ialade, ngan pyniap hi ialade, tangba ngan nym shah ba ka CAB kan trei kam ha Meghalaya bad ha ka thain shatei lam mihngi”.
U Bah Sanbor, ula ong shuh shuh ba um khuslai, lada la pyntrei kam ia ka CAB, ha ki bynta jong ka Ri India, da ki nongialam jong ka seng BJP, hynrei kam dei pat ban ktah ia ka thain shatei lam mihngi.
“Ngam salia, lada pyntreikam ia ka CAB ha ki bynta jong ka India, tangba ka donkam ban don ka jing pynkylla ia ka ain jong ka CAB, ba kane ka bill, ka dei ban lait noh na Meghalaya bad na ka thain shatei lam mihngi. Kane ka dei ka jing dawa jongnga. Nga la phah ruh ia ka dorkhas jongnga sha U Narendra Modi, myntri rangbahduh” ong U Bah Shullai. U Bah Sanbor u kren sngewkhia ruh halor ka jingtih dewiong beain ha Jaintia hills, West Khasi Hills, nangta sa u pud u sam bad ka jingkyrduh kam ha kine ki sngi.
Kiwei pat ki lad khubor ki iathuh ba U Bah Sanbor Shullai, ula leit thep ia ka vote jongu, ha ka por 12.30 mynta ka nohsngi ha Sankardev Vidyapath School bad hangta, ula kren sha ki briew kiba dang ap lain, ba kin thep ia ki vote jongki ha ka shap jongu, ha syntiew Lotus. Kiwei pat kiba don lang ha katei ka jaka, kiba na kiwei pat ki seng, ki la kren pyrshah ia kata, hynrei U bah Sanbor, ula kren khor pynban bad kumta la ujor pyrshah halor ka jing pynkhein jongu ia ka kyndon elekshon, ha ka sngi thep vote.
Phi don ban ong eiei?