“Ngan leit shimti kum u DC ka WKH” thoh u DC Jowai ha Facebook

Shillong,29’lyngkot:
Ka jingiakhih ka seng MPUF ha Jowai ka la pulom noh hadien ba u Deputy Commissioner ka West Jaintia Hills u Arun Kumar Kembhavi un sa leit ban shimti noh kum u Deputy Commissioner ka West Khasi Hills. Ia katei ka jingleit ban shimti kum u DC ka WKH u Kembhavi u la pyllait paidbah lyngba ka jingthoh ha ka page facebook ‘Deputy Commissioner Jowai’.
Ha katei ka jingthoh facebook u Kembhavi, u la ong ba mynta u don sha jngai sha Coimbatore na ka bynta ban leit training, u ong ba u la ioh jingtip ba ki la don ki kynhun kiba ia khih pyrshah ha Jowai ban pyrshah ia ka jingshah pynkynriak kam jong u ha kaba ki bor District ki la pynjari da ka section 144CrPC bad u la iathuh ruh ba u la ioh jingthoh kaba la pan por 2 taiew ban ia khih ha ka por ba u don ha Jowai hynrei um shym la ai jingbit satia namarba kam bha namarba ka jingiakhih ka long na bynta jong u.
U la ong shuh shuh ba shen ha kine ki khyndiat sngi un sa leit ban shimti kum u DC jong ka WKH bad u la ong ba u dei tang u shakri paidbah bad ka ju long hi ba u shakri paidbah u dei ban kongnguh ia ka hukum ba la pynmih ka sorkar da ka jingthoh khlem da pynphai ktien.
U la kyntu ia ki paidbah ba kin kiar ia kano kano ka jingiakhih bad kim dei ban leh pyrshah ia ka aiñ. Lah ban kdew ba ka MPUF ka la shong shah thngan ban ia khih pyrshah ia ka jingpynkynriah kam DC bad lah ruh ban kdew ba ki bor District ki la leit pynpra ia ka dara ba ki shong shah thngan.