“Ngan kit ia ki pop jong ki”

Ais Suja

Ngan kit ia ki pop jong ki, ki pop jong no? jong ki Israel kein. U Jisu u kren shai ha ka shithi u paul sha ki Nongrom halor kane ka bynta. Ngi tip ba ki Israel ne ki Jiw ki long kata ka jaid bynriew kaba eh ryndang bad ka bym ngeit ha kata ka kyrteng Jisu.

Naduh ka Testament kaba Rim ka ktien u Blei lyngba ka kitab u Isaiah bad kiwei, ladep iathuh ladep pynbna ha Israel shaphang ka khubor u Immanuel (Jisu) da u Isaiah Nongiathuhlypa kaba ong – “Namar kata, u Trai hi un ai ka DAK ha phi: hakhmih ka theisotti (Mary) kan punkhun, kan kha ruh ia u khun, yn khot iaka kyrteng jong u U Immanuel, Isaiah 7:14. Lyngngai ki ioh sngew hynrei kyllut. Ki khlem kylli ruh uei uta u Immanuel? Hynrei ki pyllut por tang ha ki niam ki rukom jong ki katba kum ki ain ki hokum u Moses.

Bun bun snem ka jingiathuhlypa u Prophet Isaiah kala urlong. Ki Angel ki la wan pynbna ba ka por ka ladei ba un wan u ta u Immanuel. U angel u Trai u Iathuh – kan (Mary theisotti) kha ruh ia u khun. Men khot ruh ia ka kyrteng jong u, U Jisu: Naba un pynim ia la ki briew na ki pop jong ki. Mathaios 1:2. Lyngngai ki Israel ki iohthiah kim patiaw, kim bna bad kim ngeit hi ruh ia kine kiei kiei. La kha ia u Jisu sha kane ka pyrthei, u la long haka pyrthei, ka pyrthei ka la long da u, pynban ka pyrthei KAM SHYM LA ITHUH IA U. Ioanis 1:10.

“U la wan sha laki jong (ha Israel), kita ki dei la ki jong kim pdiang ia u”. Ioanis 1:12. Ngi iohi b aka pyrthei Israel ka pyrthei Jiw ka kyntait thiaw ia u Jisu haduh ka sngi bala sahnarphna ia u Jisu. Ym tang hangta, hynrei haduh mynta mynne ki Jiw ne Israel kim pat pdiang ba uta u Jisu u dei u Messiah jong ki. Ki kyntait ia u. Wat lada ialap katno katno ruh ha Israel shaphang ka kyrteng Jisu, kin ymlah ban pdiang bad ki long shisha kiba eh ryndang bad kiba saitlah bad bun nia. Ki Jiw ki kylli – ym dei une uta u Jisu u khun u Joseph, ia u kpa bad ka kmie jong u ngi ithuh? hato kumne te ba u ong une nga lawan hiar na bneng? Ki Jiw ki ong shuh shuh- Ia une ngi la ithuh nangno u long, hynrei ynda wan uta u Khrist, ymdon batip nangno u long .Ioanis 6: 42/ Ioanis 7:27.

Kane ka jingbymngeit ka dang trei haduh mynta hapdeng ki Jiw. Ki tip ki sngew hynrei kim leh bad kim pdiang. Te dei na kane ka daw ba u Jisu u la ong lypa – “ba phin ympat lah dep (ban ialap) iaki shnong ki Israel tad ynda u wan u khun u briew .” Mathaios 10:23. Hangne ngi sngewthuh ba ymdon lad da leilei ban ialap iaka kyrteng Jisu ha Israel .Dei na kata ka daw ba kaba khadduh, u Jisu u hap ban kit iaka pop jong ki Israel daka jingaiei (only by grace). Katkum ka ktien u Blei ngi shem b aka por kam slem shuh ia kine kiei kiei ban jia long. Namar ka jingdap ki Jentil kaba wan hapoh bad ka jingpynim ia ki Israel kala jan, ka jingpynim ei kein. Yn pynim iaki tad ynda u Jisu un wan hiar pat na bneng –ha Jerusalem ha u lum Seion. “ U nongpynim u nongpyllait un wan mih noh na Seion , un pynphai noh iaka jingbymriew blei na u Jakob ( naki Israel kein) .” Rome 11: 26. Dei hangne kein yn pyndep ia ka ktien kaba ong-“Ynda ngan kit noh ia ki pop jong ki. ” Rome 11:27.

Namar kata ka jingaiei bad kata ka jing khot u Blei ki long ba KHLEM JING KYLLA BAMUT .Rome 11:29. Ka mut ba yn pynim ei ia ki Israel. “Ba da kata ka jingpynim ei ba shaphi (Jentil) ynioh leh isynei kein iaki ruh (Ia ki Israel).” Rome11:31-32. “KATA KA IA KA LA JAN.” Jingpynpaw 1: 3. “Ngan kit noh iaki pop jong ki”, Rome 11:27.