Shillong, 17 Rymphang:
Ka kyrtong MDC ka Congress na Jaiaw ka la ong ba pynpaw ba ka la mih madan ha kane ka kynti namar ba ka sngew khia ia ki jingeh jong ki longkmie.
Ka Kong Havergail Ediwina Bareh ka la pynpaw ia kane ha ka jingiakren bad u Rupang ha kane ka sngi Saitjain.
“Nga la mih madan ban iakhun ia ka jingeh jong ki longkmie”, la ong ka Kong Bareh bad ka bynrap ba ka jingmih jong nga kan iarap shibun khamtam ia ki longkmie.
Ka la ong ba ka district council kan treikam kham bha lada kin ioh rung ki kynthei kum ki MDC khambun. “Nga kyntu ia ki paidbah ban ailad ia ki longkmie, hynrei kam mut pat ba ngi dei ban nym pdiang shuh ia ki rangbah”, ka la ong bad bynrap ba ka jingdonlang ki kynthei bad ki shynrang hapoh ka district council kan iarap shuh shuh ba kan lah ban treikam khambha na ka bynta ka ri bad ka jaid bynriew.
Ka Kong Gail kaba ju khot ieid ki paidbah, ka la ong ba ka jaitbynriew Khasi-Pnar ka dei kaba shim jait na ka kmie bad kan long kaba bha eh ba ki longkmie ruh kin ioh ban iashong lang ha ka dorbar ka district khnang ban pynkhlain ia ka riti dustur, ban pynkhlain shuh shuh ia ka ain.
“Nga thrang ruh ban pynkup bor shuh shuh ia ki longkmie ha ka imlang sahlang, ban pyrkhing bha ha ka rukom ai trading licence, bad kiwei”, ka la ong.
Ha kajuh ka por, ka la ai khublei ia ki nongialam ka party Congress kiba ibit ban ai tiket ia ka ha kane ka kyntu hapdeng kiba bun ki rangbah ba pan tiket.
Ha kaba iadei bad ka rukom ialap elekshon, ka Kong Gail ka la ong ba ka iaid ban rung ha man ki thhliew ing jong ka konstitwensi, bad ka la kam ba ka sur jong u paidbah ha kane ka kynti, ka pynpaw ba ki kwah da ka longkmie ban mihkhmat sha ka KHADC.
Ka Jaiaw konstitwensi kan sakhi ia ka jingialeh jong lai ngut ki kyrtong ba kham paw, nalor ka Kong Gail, sa u MDC ba mynta na ka KHNAM u Bah Adelbert Nongrum, Bah Martamlin Pyrbot na ka UDP uba dei ruh u MDC barim, bad u kyrtong shimet u Bah Jarain.
Ka elekshon sha ka KHADC kan long ha ka 24 tarik Rymphang bad kan long sa shi taiew tam eiei mynta.
Phi don ban ong eiei?