Ngan iarap lada ki samla ba wanphai na shabar jylla ki shem jingeh, MLA ka Umsning

Nongpoh: U Bah Jason S. Mawlong, MLA ka Umsning, u la ai ka jingiaroh kaba khraw ia ki paidbah bad khamtam eh ia ki nongialam shnong hapoh ka Umsning Constituency, namar ka jingkylluid mynsiem jong ki ban pdiang ia kito ki samla ki ban sa wanphai na kiwei pat ki jylla hapoh ka Ri.
Haba ai jingiaroh ia ki paidbah bad ki nongialam shnong, u MLA ka Umsning, u la ong ruh ha kaba kum kane ka por ba ka sorkar ka don ha ka jingialeh ban khang ia ka jingsaphriang u khning jingpang COVID-19, nalor ka ka jingtrei shitom ki briew sorkar, hynrei kaba hakhmat eh ka long ba ki paidbah bad ki nongialam shnong ki dei ban ai ka jingiatreilang bad ban shimlang ia ka jingkitkhlieh.

Nalorkata, u MLA ka Umsning, u la ong ba u long uba kloi ban iarap ia kito ki samla kiba wanphai na shabar ka jylla, kata ka long ban iarap ha ka ban pynioh ia ki jaka lada ki shem jingeh ban ioh jaka bad kumjuh ruh lada ki shem jingeh ban ioh ia ki jingdonkam.

Katei ka jingkren u Bah Jason S. Mawlong, ka la long ha ka por kaba u la leit ban jurip ia ka Quarantine Centre kaba don ha building jong ka Balawan College, Umsning, kaba dei ruh kawei na ki jaka, kaba la pynkhreh kylluid ban pdiang ia ki samla kiba wanphai na shabar bad ha kajuh ruh ka por, kaba dei ruh ka jaka kaba la pynkhreh na bynta kiwei pat ki samla na shabar bad ki bym ioh ia ki jaka sah kiba biang.

Katei ka Quarantine Centre, kaba don ha Balawan College, la pynbit pynbiang da ka Edu Well Mission Society (EWMS) ha ka jingiaatreilang ka Dorbar Shnong Umsning Lumroman bad kaba la kyrshan radbah da ka Balang Catholic Umsning Parish COVID-19 Management Committee.