Ngan iakhun beit na Congress: Kennedy

Shillong, 19 Rymphang:
U MLA ka Mawphlang u Bah Kennedy Khyriem u la ong ba un iakhun beit naka Congress ha kane ka elekshon MLA ban wan 2018 bad kam don satia kano kano ka jingthmu da kumwei pat. U la kyntait ia ka jingher khubor hamsaia ba u lah ban nym iakhun naka Congress. “Nga dei u President ka East Khasi Hills Congress, lada don kum kata ka khubor hamsaia, ka dei kaba bakla shibun”, la ong u Bah Kennedy. U Bah Kennedy u la ong ba u la dep rai ia kane naduh u 2008 ha kaba u la iakhun nyngkong na kane ka party hynrei u khlem poi sha ka thong ha katei ka snem bad ka jingiaid neh jongu, ha u 2013, ka la pynlong ia u ban poi sha ka thong da kaba pynliem ia u Bah JA Lyngdoh.
U Bah Kennedy u la ong ba shwa ba un jied ban iakhun ia ka party ha ki por ba la dep, u la sngap ia ka sur jong ki paidbah babun, na ka iing ka sem,na ki paralok parajor ym ba u la shu rai hi marwei bad dei na kane ka daw, ba u la lah ban poi sha ka thong.
“Ka jingkylli ne ka hamsaia ban nym iakhun na ka Congress ka dei kaba bakla, ngam don kum kata nalor nga dei u nongialam ka party ka East Khasi Hills”, la ong u Bah Kennedy. Ha kajuh ka por, u la kyntait ban iabunkam ban ialap elekshon ia mynta namar ba ka por kam pat dei hynrei u la kubur ba ki don kiwei kiba la iaid bha khamtam na u Bah SK Sun uba la rai ban iakhun ha kane ka elekshon ban wan hadien ba u la shong thait dang shen kum u Chief Engineer ka PHE.
Na ka bynta u Bah Kennedy ka jingpynbna paidbah u Bah SK Sun ban iakhun elekshon ha 2018, kan nym buh jingeh ia u namar ba kum u MLA ha kine saw snem ba la dep, u la trei ia ka kamram bad ki paidbah ki dei ban bishar.