Ngan ai ka jingshakri kaba bha na kaba bha tam:Conrad

Shillong, 26 Jymmang: U MP ba dang shu shah jied thymmai na Tura u Conrad K Sangma u la ia kynduh mynta ka sngi bad ki nongthoh khubor ha ophis ka NPP ha Lachumiere, ha katei ka jingiakynduh u la ong, “Ngam da don eiei eh ban ong hynrei nga shu kwah ia kynduh ia phi kum ka dak ka jingwan iuh kjat nyngkong eh jong nga ha Shillong kum u MP ka Lok Sabha,nga kwah ban ai khublei ia phi ruh” u la ong.
U Conrad u la iathuh ba hadien ka jingjop jong u, u la leit ban ia kynduh ia ki nongialam jong ki seng saiñpyrthei bapher bapher kynthup ia u Dr.Donkupar Roy-President UDP, u bah Ardent M Basaiawmoit, President HSPDP bad kiwei pat. Ha katei ka por u la ong ba u dang ap por ban ioh ia kynduh ia u myntri rangbah ka jylla ruh u Dr.Mukul Sangma kum u nongialam ia ka jylla hynrei kham hadien u myntri rangbah u la phah wan ia u ha ka por 3 baje bad u la leit ban ia kynduh ha Secretariat.
“Kum u MP uba dang shu shah jied thymmai, nga don bun kiei kiei ban leh na bynta ka jylla bad na bynta ka ri lum Garo kiba ngam lah shuh ban batai hangne u la ong, nga shu kwah ban ong ba ngan ai ka ijngshakri kaba bha na kaba bha tambad ngan pynthikna ruh ba ka sur u paidbah kan sawa bad ka jingangnud kan urlong shisha, nga kyntu ia u myntri rangbah bad baroh ki seng saiñpyrthei bapher bapher ba ngin ia treilang baroh na bynta ka jingmyntoi jong ki paidbah ka jylla” ong u Conrad K Sangma ha ka jingiakren bad ki nongthohkhubor.Haba la kylli kiba kum kino ki mat un shim ha khmat eh hadien ba u la poi sha ka kyrdan MP, u Conrad u la ong ba ki mat kiba hakhmat eh ka dei ia ki samla bad ki nongrep, “Haba ngi ong ki samla ka ktah lut nadong shadong naduh ka pule puthi, haba kren ia ka pule puthi ka ktah ruh ia ki nonghikai, ka jingkyrduh kam kyrduh jam ki samla, ka shongsuk shongsaiñ,ki kam ialehkai bad kiwei pat kiba bunbah ki jingiadei bad ki samla. Haba ngi ong pat ia ki nongrep ka kit bun jingmut ngi hap peit naduh ka lynti syngkien,ka surok, ka iew ka hat, ka jingiadei bad ki rukom pynmih mar bad kiwei pat kiba ngin ym ia kren lut hangne” u la ong.