Ngam tip ia ka jingthmu den ia ka wah khri, ong u CS ka Assam

Shillong, 24 Jylliew:
U Chief Secretary ka Assam u Naba Kumar Das u la ong ba um don jingtip ei ei ia ka jingthmu ka Assam ban den ia ka wah Khri kaba la tip ha Assam kum ka wah Dron.
“Ngam tip ei ei ia ka jinglong jinglong jong kata bad ngan hap ban peit ia ka” la ong u Das.
Ka wah Khri ka la long ka jingiakajia hadien ba la iathuh ba ka Assam ka la thmu ban den ban pynmih bording ha ka thain Kyrshai kaba don ha khappud bad ka Meghalaya ha West Khasi Hills.
Kham mynshwa ka Indigenous Biodiversity and Social Welfare Organisation (IBSWO), ka la ong ba ka jingshna ia ka dam kan pynkylla phetwir ia ki paidbah katei ka thain.
Lada shah ban tei ia ka dam, kan sa tyllep ia ka Jirang ha Ri-Bhoi district, ka Mawthadraishan bad Rambrai ha West Khasi Hills district.
Dang shen, la iathuh ba ka Assam ka la surbe ia ka wah Khri kaba don ha shnong Kyrshai ha West Khasi Hills district ban wad kumno ban shna ia ka dam.
La iathuh ba ka Assam ka la thmu ban shna katei ka dam ban pynmih bording 2 MW micro ha ka jingmang kaba R. 13 klur.