Ngam sngewpher ban shah khot nongpyrshah India, na ka bynta ka Jaidbynriew, ong u President ka KSU Sengkmie

Nongpoh:Ha ka sngi kaba ka Khasi Student Union (KSU), ka la ioh ban ban pynskhem ia ar-tylli ki Unit kata ka Sohkhwai Unit bad Shakoikuna Unit ha Ri Bhoi, u Samla Lam bokstarwell Marngar, President ba Rangbah ka KSU, u la kyntu kynpham ia ki dkhot ka KSU ba ki dei ban longshlur na bynta ban iada iala ka jong ka Ri bad Jaid bynriew.

Haba kren ai mynsiem sha ki dkhot ka seng, u Samla Rangbah Lam bok starwell Marngar, u la pyni ia ka nuksa u Wickliffe Syiem, uba la long Nongpyrshah India (Anti-India) ha khmat ki nong Ri Thor, hynrei u la long riewkhraw pat ha la ka Ri bad ka Jaidbynriew bad uba baroh ki briew ki burom ne niewkor ia u, namarkata ka dang lah ban shah khein Anti-Indian ha ki nong ri thor, na ka bynta ban im ka Jaidbynriew.

Shuh shuh, utei u nongialam ba rangbah eh ka KSU, u la ong ba kam myntoi ban mane ia ki blei Ri thor, katba ki paia bad ki rishot ka Jaidbynyriew ki nangtor bad nangtlot katba nangmih ki sngi. Namarkata ka jingrem ha madan Thma kam dei kaba jah burom, hynrei kaba pyndem khlem da shlan ban ia aireng ka dei ka ba jem rngiew bad pohdor eh.

Haba iadei bad katei ka jingpynskhem ia kitei ki ar-tylli ki Unit kiba hap hapoh ka KSU Arphew Mer Circle bad KSU North Khasi Hill District Unit (NKHDU), kiba la donlang ha katei ka sngi ki kynthup ia u Samla Biangbor Paliar Vice President KSU Sengkmie, u Samla Ferdinald Kharkamni President KSU NKHDU, u Samla Lambok Rymbai, General Secretary ka KSU, NKHD, u Vincent Makri Assistant Finance KSU NKDHU, Samla August Nongbri Finance Secretary KSU NKHDU, Samla Banjop Maring Education Secretary KSU NKHDU, u Samla Khraw Sylliang, President KSU Arphew Mer Circle, u Bah Jayand Sylliang Assistant G.S KSU NKHD lem bad kiwei ki dkhot ka seng.

Ia kitei ki ar-tylli ki Unit, la pynskhem da u Samla Rangbah Lambokstarwell Marngar President KSU CEC.
Ki nongkitkam Shakhoikuna Unit, ki kynthup ia u samla Samla Rovinson Maring kum u President bad u Samla Chem Nongshli kum u General secretary, ha ryngkat ki 17 ngut ki dkhot ka seng. Katba ki nongkitkam ka Sohkhwai Unit, ki kynthup ia u Samla Nat Namsaw kum u President bad ia u samla Arius Sylliang kum u General Secretary ha ryngkat ki 16 ngut ki dkhot.