“Ngam shong kli kti” ba duh tulop ki nongtrei MCCL:Titos

Shillong, 11 Jymmang:
Ki nongtrei ka Mawmluh Cherra Cement Limited ( MCCL) kim shym la ioh tulop mynta la 8 bnai kynthih bad katei ka jingbym ioh tulop ka la pyniakynduh jingeh ia ki nongtrei katei ka karkhana haduh ba la poi u pud ba ki hap ban iakhih ban dawa ia ka hok jong ki bad ki la pynpaw ruh ia kiba bun ki jingeh halor katei ka jingbym ioh tulop.
Haba pynpaw ia ka jingsngew diaw mynsiem namar ka jingbym ioh tulop ki nongtrei ka MCCL kaba la long haduh 8 bnai kynthih mynta, u MLA ka Sohra u bah Titos Chyne u la ong ba na ka liang jong u kum u nongmihkhmat um shym la shongthait bad u iai buddien na ka por sha ka por ban peit ba ka MCCL kaba dei ka pliang ja ki nong Sohra kan dei kaba iaid beit iaid ryntih bad kan bit kan biang.
“Ngam shong kli kti” ong u bah Titos ha kaba ia dei bad ka jingeh ka MCCL , u la kdew ruh ba hapoh Ing Dorbar Thaw-ain u la thalain tyngeh ha kaba iadei bad katei ka mat, u la ong ba wat hapdeng ka jingbym don ha ka met kaba koit kaba khiah ruh u la par dohiap sha ing dorbar thaw-ain ban ioh iatai ia ka jingeh ka MCCL.
U la ong ba na ka por sha ka por u la leit ia kynduh ia ki bor sorkar ban ia kren ia katei ka kam bad ka sien kaba khadduh eh ba u la leit ban ia kynduh ka dei ha u nohprah jong u snem ba la dep ha kaba u la leit ryngkat bad u Dr.Donkupar Roy bad ki la ialam ruh ia baroh ki nongtrei MCCL ban ia kren bad ka sorkar. U la pynkynmaw ba hadien katei ka jingiakynduh , ka sorkar ka la pyllait T.16 klur tyngka ia katei ka karkhana pynmih dewbilat kaba don ha Mawmluh, Sohra , “Hynrei kaba lyngngoh na ka T.16 klur tyngka ki siew tulop tang 2 bnai ia ki nongtrei katei ka karkhana, shano ka T.14 klur tyngka ka jah” ong u MLA ka Sohra. Shuh shuh u la ong ba dang ha ki khyndiat bnai ba la dep u la hiar ryngkat bad ka Public Undertaking Committee ba la khlieh da u Salseng C Marak ban jurip ia ka MCCL.
Hadien ba la iatai ha ing dorbar Thaw-ain u bah Titos u la ong ba ka sorkar ka la kular ban Commission ia ka plan kaba thymmai ha ka 15 tarik u jymmang, 2015 bad na ka liang jong u –u la ong ba un hiar sha katei ka karkhana ha ka 16 tarik u jymmang ban peit aiu ka sorkar ka la leh.