Ngam pat thaw kynhun, ong U Bah Mansturdy

Shillong, 6 Iaiong:
U Chairman ka KHADC uba dei ruh u MDC jong ka Langrin kon stitwensi u bah Mansturdy Nongrem u la ong ba ki khubor kiba paw ha kine ki sngi ha ki lad khubor ym ha u Rupang ka pyni ba la ong ba ia ka jingthoh ba la soi ki MDC ban kyrpad na u CEM ban pynheh shuh shuh ia ka jingioh jong ki MDC na ka T.2 klur marwei la pyn wandur pynban kum ka jingthoh kaba pyni ba kitei ki MDC kiba lasoi kyrteng ki kwah pynhap shuki ia u bah Pynshngaiñ N Syiem bad la kam ruh ba ki dei ki kynhun jong u.
Halor katei ka jing thoh u bah Mansturdy u la ong “Haduh mynta ngam pat thaw kynhun, haduh mynta ngam pat lum jing ialang bad ngam pat don jingmut ruh ban pyn khyllem shuki, hynrei nga shu kren tang ia ka rukom treikam ka Executive Committee hangne (KHADC)” u la ong.
U la ong ba ki jingkren jong u ia ka rukom treikam ka Executive Committee ka dei halor ki ar tylli ki mat kata kaba nyngkong ka dei ka jingbym iahap jingthew shuh ha ka rukom bhah ia ka pisa kaba T.133 klur tyngka kaba la ai tang mar T.2 klur tyngka sha manla u MDC bad ka bym patkot tang 50 % ruh bad haba ia kheinlang ka poi tang T.46 klur sha ki MDC bad kaba tam pat ka long haduh T.87 klur tyngka. Kawei pat ka mat kaba u la kren ia ka jingbymbiang ka rukom treikam ka EC ka dei halor ka jingkhrong khajna ka KHADC na ki trok kit dewiong kaba u la ong ba ka dei ka jingkhrong be-aiñ nalor ka sorkarlyngba ka DMR ka la dep ban shim khajna bad kane u la ong ba ka dei ka jinglum khajna ar shah na ki paidbah kaba bun ki paidbah ki bitar.
U bah Mansturdy u la ong ba katei ka jingkhrong khajna ka KHADC kaba u kren ka dei tang kaba la jia hapoh ka konstitwensi jong u kata ha Ranikor bad ka Borsora hynrei u la ong ba um shym kren ia kiwei pat ki konstitwensi kum ha Majai bad shawei. U la iathuh ba katkum ka jingtip jong u la khrong ia katei ka khajna ha Majai bad kumjuh ruh ha West Khasi Hills hynrei ha West Khasi Hills u la ong ba u DC u la pynsangeh noh bad ha konstitwensi jong u pat u la ong ba u la dep ia kren bad u SP kumjuh ka DC bad shen ka DC kan pynmih ia ka hukum.
Watla u la pyntip sha u CEM ba u dei ban weng noh ia katei ka jingkhrong khajna kaba T.200 tyngka kawei ka trok u bah Man u la ong ba u CEM u khlem weng ia katei ka hukum. “Ho, oid nga u MDC ka thaiñ nga bitar ia katei ka jingkhrong be-aiñ nalor ba ka District Council ka la ioh la ka jong ka bhah na ka sorkar (lyngba ka khajna bad Challan ka DMR)” ong u bah Mansturdy.