“Ngam pat ju iohi ia ka Mawlynnong” her kyrkieh u Dr.Mukul na Raid Shabong

Pynursla, 5 Nohprah:
U myntri rangbah ka jylla uba la long kum u kongsan ha ka jingialang rakhe 50 snem ka Raid Shabong Border Area Govt. U P School, u la ai daw ba u hap ban mih kyrkieh na ka jingialang katei ka skul namarba u kwah ban leit peit ia ka Mawlynnong kaba mynno mynno ruh um pat ju iohi ia katei ka shnong kaba ka pyrthei baroh kawei ka la tip lut, bad kaba la bna nam kum ka shnong kaba khuid tam. U myntri rangbah u la ong ruh ba u kyrkieh eh ba u dang don ruh ka sa ka jingia bamja miet bad ki heh ki hain na Myanmar kiba la wan sha Shillong.
“Nga la kren ha kiba bunbah ki rynsan , nga la kren sha kiwei pat ki Ri ka pyrthei shaphang ka Mawlynnong, la kumba nga la tip lut ia ki kyndong kynshrot jong ka, hynrei sngewbha wat ju ia thuh khana ia kane ba ngam pat ju iohi ia ka Mawlynnong” ong u Dr.Mukul ha katei ka jingialang.
U myntri rangbah u la ong ruh ba mynta ka sngi un ym pynlut than hapoh katei ka jingialang namar ba u la kham kyrkieh eh ban hiar sha Mawlynnong, “Mynta ngan leit ban peit ia baroh kawei ka Mawlynnong, bad ngin ia peit kiei ki jingdon thymmai ba ki donkam ban leh ha katei ka shnong ban nang khring shuh shuh ia ki nongwan jngohkai ki Ri ka pyrthei” u la ong biang.
Ha ka jingiaid lynti jong u ban leit sha Pynursla, u Dr.Mukul u la ong ruh ba dei ba pynkylla dur ia ka surok ka thain Pynursla haduh ban da poi sha Mawlynnong, khnang ba ki briew kiba na bar kin ym dik eiei haba ki wan ban peit kai ia katei ka thain.
Kham hadien ba u myntri rangbah u la leit jngoh ia ka Mawlynnong u Rupang u la ioh ban ia kren bad u Rangbah shnong katei ka shnong, ha ka jingiakren u rangbah shnong u la ong ba ka jingwan u myntri rangbah ka dei kaba la ioh jingtip lypa la kumba shiteng bnai , bad na ka jingiakren la sngewthuh ba la don ki jingpynkhreh kiba iphuh iphieng ban pdiang sngewbha ia ka jingwan u myntri rangbah, hynrei u tangbah shnong u la ong ba u myntri rangbah u la kyrkieh palat bad u la pynlut tang kumba 20 minit ha Mawlynnong, bad u la ong ba un sa wan ban pynlut kham bun por ha kawei pat ka sngi. “Ngi la shu ia khublei kti, ia rwai pdiang sngewbha, ai memorandum” ong u rangbah shnong.
Haba la kylli hato u myntri rangbah u la leit ban shang tawiar ia ka Mawlynnong kumba u la pynpaw ha ka jingialang ha Pynursla ba u hap ban leit peit ia ki kyndong kynshrot ka Mawlynnong, “Em, u la ong ba u la kyrkieh palat” ong u Rangbah shnong.