Dei ba ak u Marangbah ka jingrwai Bolbaring ka sa iaid bha:Amunick

Shillong 05 Nailar: U wei u samla ia u ba la tip kyrteng u Amunick Shadap u ba dei na ka shnong Lumdaitkhla Bhoi Rymbong u ba la paw pyrthei bha mynta lyngba ka social hadien, ba ki paidbah ki la sngewtynnad ban sngap ia ka jingrwai ka ba u la pynmih lang ryngkat ka dur khih ne ka video ka ba ka ai kyrteng “Bolbaring”.

U samla Amunick Shadap u la rwai hi ia katei ka jingrwai ka ba kyrteng “Bolbaring” ha kaba u la thep bad pyni paidbah ha ka YouTube Channel ka ba ai kyrteng Amunick Shadap bad kane ka jingrwai mynta ka la poi haduh 75 lak ngut ki nongpeit, ba u la thep ha u bnai lber 2024.

Ia kane ka jingrwai “Bolbaring” la ringdur da u samla Elvest Thabah bad ka ba la ak da u bah Keebor Kurbah ba ju khot ieid u Marangbah kum u tyngshop bad ka Barisha Kharumnuid kum ka puron bad la iadonlang ruh bad kiwei kiwei de ki ba ia ak lang.

Ka jingiaid bad kiew sted kane ka jingrwai “Bolbaring” kadei namar ba ki paidbah ki sngewtynnad palat ia ka jingrwai u samla Amunick bad ka jingnang jong u Marangbah ban ak komide ban khring ia ki nongpeit bad ka jingpyni ruh ia ka bolbaring ba ka shna tang da ka ding.

Ha ba iakren bad u nongthoh khubor jong u Rupang u samla Amunick u la iathuh, ba u khlem poi pyrkhat ba kane ka jingrwai kan sa iaid bha bad kan sa kiew sted haduh ba ki paidbah ki la ithuh lut ia u bad ki la  tip ia kane ka jingrwai.

U la pynpaw ruh ka jingsngewkmen ban iohi ba ki paidbah ki la ai shisha ka jingkyrshan ia kane ka jingrwai naduh ba la sdang pynmih.

Ha ka ba iadei pat bad ka jingrwai u la ong, ba ban rwai ia ki jingrwai shaphang ki jingrwai samla ne jingieid um da nang bha haduh katta katta bad nang hi malu mala bad um tip kumno ban rwai namar ba u ong, ba ngi long ki ba riam lyngkrung lyngkrang ym don por ban leh stai katba ngi ioh, ym ki ba lehstai, hynrei ban rwai ne thaw ia ki jingrwai komedi u nangbha.

“Lyngba kane ka jingrwai ” Bolbaring ” Katba nga iaid shano shano ki paidbah kim khot shuh da ka kyrteng hok hynrei ki la khot beit da u bah Bolbaring, la bynrap u bah Amunick.

Kumta u bah Amunick u la khot bad wer ia ki paidbah, ba kumba ki ai ka jingkyrshan ia kane ka jingrwai “Bolbaring” Kin sa nangai ka jingkyrshan nakabynta kiwei pat ki jingrwai ki ba un sa pynmih biang ha ki sngi ban dangwan.