Ngam mynjur ba ka BJP ka kiew sted ha Garo: Zenith

Shillong, 04 Naiwieng:
U myntri sorkar jylla uba dei u MLA ka Congress u Zenith M Sangma u la ong ba um pdiang satia ban ong ba ka BJP ka la kiew sted ha kane ka jylla. “Ngam mynjur ba ka BJP ka la kiew sted ha GaroHills, ka Congress kan sar ha ka elekshon ban wan ha u 2018 na Garo Hills,” la ong u Zenith Sangma haba kren ha kane ka sngi.
Haba kylli ia ka jingwan pyniasoh bun ki briew sha ka BJP ha Garo Hills, u Zenith u la ong biang, “Ngi la don ka jingkhein lajon jong ngi, ngi la don ka buit treikam jong ngi, ngi tip kumno ban ialeh pyrshah ia ki buit ka BJP bad ngin sa jop kput ha u 2018”.
U la wohnia ia ka shatri NEDA, da kaba ong, “Kane ka NEDA la thaw ym na ka bynta ka roi ka par jong dong mihngi hynrei na ka bynta ka sain pyrthei khnang ban ialeh pyrshah ia ka Congress”.
Hapdeng ka jingialeh ia ka elekshon MDC shiteng samoi ha Khasi bad Jaintia, ka Congress ka la pynkhreh ruh na ka bynta ka elekshon 2018.
Kane ka jingkren jong u Zentih ka long wat hapden bun ki paidbah bad haduh 4 ngut ki MDC na GHADC ki la pyniasoh dang shen bad ka BJP nalor bun ki riew paidbah kiba la pyniasoh sha ka party ha ka jingialang ha kine ki bnai ba la long ha Tura bad ha kiwei ki jaka.