Ngam kwah kynthoh: kong Fenella

Shillong,24 Iaiong:
Hadien ba ka CEC ka HSPDP ka la pynbna ia ka rai beh seng ia ka kong Fenela, na ka liang jong ka ka la ong ba ka pdianghun ia kaei ka rai ba ki shim, bad ka la kitbok kit-rwiang ruh ba nangne shakhmat kin dang lah ban trei khambha ha ka jing shakri paidbah jong ki. Ka kong Fenela ka la ong ba haduh mynta kam pat ioh kino kino ki jingthoh na ka HSPDP ba la beh seng ia ka ka la ong ruh ba kam kwah ban kynthoh eiei halor katei ka jingshah beh seng kaba ka la ioh khubor hynrei tang kawei ka la ong ba kam don shuh ka synshar paidbah hapoh ka seng HSPDP, “Kumno yn wad ia kata ka synshar paidbah, lane ka Clean Politik haba tang hapoh ka seng ruh kam don”’ ong ka kong Fenela haba ia kren bad u Rupang.
Kham mynshuwa ka kong Fenela ka la ong ba lada ka HSPDP ka sngew ba ka dei ka nongpyrshah seng ka la dei ban pan jingshai ha kano ka dur ba ka pyrshah seng, “Ngan pynshai shiphew sien ruh lada kim hun” ong ka kong Fenela kham ha shuwa ha ka por ba ka HSPDP -WKH ka la pynbna ba ka la beh seng. Ka kong Fenela ka la ong ba kam ioh tang kawei ruh ka jingphah pynshai ha ka seng HSPDP hynrei la shu tep im-im ia ka.