“Ngam khmih lynti ban iohi biang ia u”, ong ka kmie u samla ba jah

Shillong, 24’lyngkot:
“Ngam ju khmih lynti ba ngan dang iohi biang ia u , hynrei borabor dei ban shaniah ha u blei, dei u Blei uba la ai biang ha ngi ia u khun jong ngi, ngam don eiei ban siew kylliang iano iano ruh, tang ki jingduwai ba u blei un kyrkhu ia phim, ngi sngewnguh ia baroh kiba la iarap ia ngi” ong ka Nedila Sangma ka kmie jong u samla ba la jah 4 snem kynthih na la ing haba ka la ioh ba nia kynduh biang ia la u khun uba ka kheiñ kum uba la iap.
U Sillian Sangma u samla ba dang 25 snem karta u la jah na la ing saw snem kynthih namar ka jingjah lynti ha ka por ba u wan phai na Chennai ban wan sha nongbah Guwahati hynrei haba la poi ha nongbah Kolkata u la sakma noh bad baroh ki jingdon jingem jong u ki la jah, ha ka kutlad u im da kaba khrong ha katei ka nongbah tad haduh ba un da ioh wanphai biang sha la ing da ka jingiarap ki nongleh isynei.
U Sillian u la poi ing mynta ka sngi sha ka shnong Rongchigre kaba don hajan Rongram, West Garo Hills ryngkat kiba haing hasem jong u kiba la leit shaw ia u na nongbah Kolkata.