Ngam ka jingshit tasam shapoh um, iap lut ki dohkha ha ka pung ha Assam

Guwahati:Ka jingshit jong ka suinbneng ha jylla Assam ka la ktah ym tang ia u briew hynrei ia ki mrad ruh kumjuh bad katei ka jingshit, ka la ngap sha ka pung um ba jylliew ruh, ha kaba da ki bun phew tylli ki dohkha ki la iap ha kawei ka pung Bongaigaon bad la lap ia katei ha ka sngi u Blei.

U trai jong kane ka pung ha ha betbari Bongaigaon, u la ïathuh ba ha ka sngi u blei, u la lap ba bun tylli ki dohkha ki la per ha sla um.
Haba peit ia kine ki dohkha u shem ba baroh ki la iap bad ka jingiap jong ki ka dei namar ba la jur palat ka jing shit kyrang jong ka sngi.

U trai jong kane ka pung dohkha, ia u ba la tip kyrteng kum u Dhaneshwar Rai, haba iakren bad ki lad pathai khubor, u la ong ba kumba 80 haduh 90 kilo ki dohkha ha kane ka pung ki la iap, kynthup ia ki barit bad baheh.