Ngam jyllop ka samla, ba kylla ka lieng ha Krang Suri

Shillong, 19 ‘lyngkot:
Kawei ka theilud kaba dang 18 snem karta ka la iap na ka daw ba ka la ngam jyllop ha kawei ka pung kaba don ha Krang Suri ka jaka jngoh-kai kaba don ha ki thaiñ Amlarem-War Jaintia. Katei ka theilud ka dei kaba la tip kyrteng kum Trisha Sen Bhattacharjee kaba shong basah ha Rilbong, Shillong. Katei ka samla ka dei kaba dang leit klas XII ha Loreto School, Shillong.
Mynta ka step ki la mih shi bahaing hasem ryngkat ki paralok da ka jingthmu ban leitkai pyngngad sha Shnongpdeng kaba don sha ki thaiñ Dawki, hynrei namar ba ki iaid lynti lyngba ka Jowai ki la leit sha Krang Suri da ka jingthmu ban pynlut por shuwa shiphang arphang hangtei. La iathuh ba haba la poi ha katei ka jaka ki kwah ban shonglieng bad ki la shong 7 ngut ha kawei ka lieng hynrei katba ki dang ia muja ka shonglieng kynsan kynsan ka lieng ba ki shong ka la kylla bad baroh 7 ngut ki la hap hapoh um. Katei ka jingjia la ong ba ka jia ha ka por 12 baje shiteng sngi.
Ki briew kiba don ha katei ka jaka mar mar ki la leit ban iarap bad ki la lah ban sei noh ia ki 6 ngut ha ka por kaba biang bad ki la sei khadduh ia ka Trisha kata tang hadien 5 minit ba la sei ia kitei kiwei, hynrei la ong ba ka Trisha kam tip briew shuh bad mar mar la pynkit sha Nongtalang CHC hynrei haba la poi ha katei ka jaka sumar ki doctor ba don hangtei ki la iathuh ba ka la iap shuwa ban poi sha CHC.
Ki lad khubor ki la iathuh ba ia kate ka jaka jngohkai (Krang Suri) la pyniaid da ka Raid Amwi Tourism Promotion Society, la iathuh ruh ba katei ka lieng ba ki 7 ngut ki shong ka dei kaba dang shu buh thymmai bad ka dang don ha katei ka jaka dang shi taiew mynta kaba ki nongpyniaid ki pyrshang ban pynmuja ia ki nongwankai da kaba kin ioh ban shonglieng. U Jason Mairom, Sub Divisional Police Officer na Amlarem u la pyntip sha ki lad khubor ba katei ka theilud ka dei kaba dang 18 snem karta , ka jingtohkit halor katei ka jingjia ka dang iaid shakhmat.