“Ngam ju poi pyrkhat ba nga hap mih madan, hadien ba la long MLA” rKi Rangbah Shnong tieng eit, ki pynjem daw ia ka jaitbynriew

Shillong, 6 Nailar:
U bah Ardent M Baiasawmoit u la ther tyngeh ia ki Rangbah Shnong ki bym shym la shimkhia ban kit ban bah ia ki jingeh kiba u paid bah ia kynduh khamtam ha kine ki sngi. U la ong ba jin lada ki Rangbah Shnong kin pyntip paid bah ha la ki jong ki shnong ia katei ka jing ialang bah kaba la long ha Madan Malki, ka madan kan ym ngiam shuh bad katno tam lei lei lada kin ialam ma ki nakhmat ia u paidbah ban leit sha katei ka jingialang, “Nga tip ba u paidbah u kyrshan ia ka jingiakhih jong ngi namar ba baroh ki la ia kynduh jingeh namar ka jingpynbna ka sorkar kaba kyntur da ka MUDA, tang ban pyntip sha u paidbah ba kan don ka jingialang ka la biang ia ki Rangbah Shnong, hynrei kim shym la pyntip” ong u bah Ardent M Basaiawmoit.
Shuh shuh u la ong ba ki don pynban ki Rangbah Shnong kiba pyntieng ia u paidbah ban leit sha ka jingialang ha kaba don kiba ong “Peit lada phi leit shato lada jia eiei ia phi, ngi te ngin ym kitkhlieh’, “Ki dei ki Rangbah Shnong tiengeit, lada phi tieng eit kam myntoi ba phin ialam ia u paidbah hiar na ka shuki jong phi” ong biang u bah Ardent bad ha ka juh ka por u la ong ruh, “Kine ki Rangbah Shnong tieng eit ki dei ma ki kiba pynjem daw ia ka jaitbynriew da kaba thok im im peit peit ia u paidbah ha ka 30 tarik ha madan Polo”. “Kam don jingmut ban long Rangbah Shnong bad ka tiengeit, Ngi donkam ia ki nongialam kiba shlur, hynrei ngim dei pat ban leh kulmar ngi dei ban iaid ha ka lynti kaba dei” ong shuh shuh u bah Ardent.
Haba kren ha ka jingialang kaba la long ha ka por shiteng sngi ha Madan Malki u bah Ardent u la ong ba um ju poi pyrkhat ba hadien ba la long MLA un dang hap ban mih madan biang sa shisien kum ha ka por ba dang long sengbhalang ban ia khih pyrshah ia ka sorkar. “Ngam ju poi pyrkhat ba ynda nga la long MLA nga dang hap ban mih madan biang” ong u bah Ardent, uba la ia thuh ruh sha ki paidbah ba ka daw kaba la pynlong ia u ban mih madan ka dei namar ka jingkyllut, ka jingkumar bad ka jingehdohnud ka sorkar kaba la ialeh pyrshah pynban ia ka sur u paidbah.