Ngam donkam syrnot na U Himanta, ong U Mukul

Shillong, 30 Iaiong:
U Myntri Rangbah ka jylla, u Dr Mukul Sangma u la kynthoh kylla ia ka jingkren jong u Myntri ka Assam uba dei ruh u nongialam ka Bharatya Janata Party (BJP), u Himanta Biswa Sarma ba ka sorkar Congress ha Meghalaya kaba ialam da u Dr Mukul Sangma, ka dei kaba sniew tam haba ianujor ia ki jingtreikam bad kiwei ki sorkar ha ka dong Mihngi.
Haba kren sha ki nongthoh khubor ha Amlarem hynnin ka sngi, u Dr Mukul u la ong, “Ngam donkam syrnot na kiwei halor ka jingtreikam jong ka sorkar jong nga, ka jylla Meghalaya kam donkam ia ka syrnot na u Himanta, nga donkam ban leit tang sha ki paidbah bad ki paidbah ka jylla kin sa bishar ia ka jingtreikam jong ka Sorkar”, ong u Dr Mukul.
Kane ka jingkynthoh jong u Dr Mukul ka long hadien ba kham mynshwa, u Himata u la kam ka sorkar Congress ha kane ka jylla ka dei kaba sniew tam na ki sorkar ka Dong Mihngi bad ha u 2018 u Dr Mukul un sa rem beit ha ka elekshon.
U Myntri Rangbah ka Meghalaya u la pynphai nia da kaba ong ba ka thong jong ka sorkar ka long ban wanrah ia ki kam pynroi ha baroh ki bynta jong ka jylla bad ka sorkar kala dep ban pyni sha ki paidbah ia ki kam jong ka ha kylleng ki bynta jong ka jylla la ka long ha sor ne ha ki jaka nongkyndong, namar kata ym donkam syrnot na u Himanta hynrei ki paidbah kidei ki nongbishar ba stad tam ki ban rai.
U Myntri Rangbah u la ong ruh ba ki paidbah ha ka jylla ki dei kiba stad, kim dei kiba jied kulmar ia ki nongmihkhmat hynrei kida bishar shwa, u ba kumno u briew ban jied.
“Ki nongshong shnong ha ka jylla ki kham pher haba ia nujor bad ka jingjied ia ki nongmihkhmat namar ki da peit bniah, ki da bishar bad ki long kiba husiar bad ka jingkhlaiñ jong ka jylla kadei na ka jingkhlaiñ jong ki paidbah”, u la ong.