Hyderabad: U K Chandrashekar Rao, myntri rangbah ka Telangana, u iathuh hynnin ka sngi, ha ka iing dorbar jong katei ka Jylla, ba ma u ruh, um don syrnot sngi kha satia.
“Haba ialade ngam don syrnot sngi kha, kumta ngan pynioh ia ka syrnot sngi kha jong u kpa jongnga” ong U Rao, da kaba kynthoh halor ka jing iadei bad ka jing pynkhreh ban pyntrei kam ia ka National Population Register (NPR), kaba dei ban trei kam naduh ka 1tarik Iaiong 2020.
“Ka dei ka mat kaba khia shibun ia nga. La kha ia nga ha iing bad ym don hospital ha katei ka por ha ka shnong jongnga. U Rangbah Shnong, u ai ia ka ‘Janma Nama’ ka bym don muhor satia” ong U Rao, uba dei u myntri rangbah ka Jylla.
“Ha ka por ba kha ia nga, ngi don ia ka jaka kaba 580 acre. Kumta haba ngam lah ban pynioh ia ka syrnot sngi kha ialade, kumta kumno ki dalit, ki tribal bad kiwei de ki duk ki rangli kin ioh ia kitei ki syrnot sngi kha jongki” ula ong shuh shuh.
Haba kren halor ka ain Citizenship Amendment Act (CAA), u ong ba katei ka long kaba pyrshah ia ka riti synshar Ri, namar ba ka riti synshar, ka kular ia ka jinglong ryngkat dor jong baroh ki nongshong shnong, khlem da ia khein ia ka niam, ka jait ka kynja bad ka longbriew manbriew jongki. “Yn nym don kano kano ka kynhun ba shemphang jong ka imlang sahlang, ka ban pdiang ia katei ka ain, kaba ithuh tang ia kawei ka niam” ula ong shuh shuh.
Phi don ban ong eiei?