“Ngam dei u ‘kyrtong shynrong dur’ i lok jong nga”, ong u lok Kong Ampareen

Shillong:  U kyrtong ka Congress na Malki-Laitumkhrah u bah Fantin Jospeh Lakadong u la ong ba um dei satia kum uta u kyrtong shynrong dur jong i lok jong u, ka kong Ampareen Lyngdoh hynrei u dei u kyrtong jong u paidbah.

Ha ka jingkren jong u sha ki lad pathai khubor mynta ka sngi, u bah Fantin u la ong ba ka jingkynnoh jong kiwei ki paralok ba iakhun pyrshah ia u ha kane ka elekshon kum uta u dummy candidate ne kyrtong shynrong dur i lok jong u, ka long ban shu pynkulmar bad ialam bakla ia ki paidbah ka konstitwensi.

“Lada nga ong ba ngam dei u dummy candidate i lok jong nga, wan bud bad nga, man miet man sngi, kaei ka bym ia hap ngi iatainia (debate), ym dei ba shu kyrngah khlieh hynrei ka don ka jingiania. Lada phi don ryngkat, phin iohi da la ki jong ki khmat”, la ong u bah Fantin.

Shwa ia kane, ka kong Ampareen ruh kaba dei ka MLA ka thain, ka la pynshai ba u lok jongka, um dei satia u dummy candidate ne kyrtong shynrong dur jong jong ka.

“Kan don beit ka jingkynnoh ba kane ka dei ka elekshon jong ka Kong Ampareen hynrei nga kwah ban pynshai ba im dei i dummy candidate jong nga kum ka MLA”, la ong ka kong Ampareen bad ka la bynrap, “Ngi ar ngut ngi long shi kurim bad nga ioh sngew da ka skhor ia ka jingangnud bad ka jingsngew diaw jong i lok ia ka jingjia ha KHADC ha kine ki sngi”.

U Bah Fantin un sdang ruh ia ka jingialap elekshon lashai ka sngi da ki jingialang paidbah.

Ha kawei ka liang bah Fantin ula pynpaw ia ka jingpyrshah jur ia ka jingpynrung ia ka ktien ‘Territorial’ ha jaka ka ktien ‘District’ ha ka jingthmu wanrah ia ka jingpynkylla ia ka khyrnit ba hynriew ka riti synshar ka ri.

U bah Fantin u la ong ba kane ka ktien ka don ka jingma halor jongka namar ba baroh yn hap shah leh donbor da ka sorkar pdeng ia ki dorbar shnong. U la buh jingkylli balei ym lah ban iatreilang bad ka sorkar jylla. U la kam ba ka sorkar pdeng ka thmu ban klun ia ki bor shnong da kaba pynbiej ha ka pisa ban pynpoi beit sha ki khlem da iaid lyngba ia ka sorkar jylla.

Ka sorkar pdeng ha ka jingthmu ban pynkylla ia ka khyrnit ba hynriew ka riti synshar ka ri, ka la pynkylla ia ka ktien jong ki Autonomous District Council sha ka Territorial Council kaba mut ba ka Khasi Hills Autonomous District Council kan kylla sha ka Khasi Hills Autonomous Territorial Council bad kumjuh ia ka Jaintia bad ka Garo Hills Autonomous District Council.

Ha kajuh ka por, u bah Fantin u la ong ba un iakhun ia kane ka elekshon halor ki mat kiba iadei bad ka jingeh jong ki nongrep, kiba duk, ki kam pynroi kiba dang duna kyrhai ha ka konstititwensi kaba u la lap ha kine ki phra bnai ba u la iaid ban iakynduh ia ki paidbah.