Nga wan kum u Nongtuh!

AIS SUJA

Ha khmih nga wan kum u nongtuh! Jingpynpaw 16:15. U ong, ngan wan kum u nongtuh. Kum u nongtuh – mano ba tip ia ka por ba u wan u nongtuh? U nongtuh u shait wan tuh ha ka por ba jar jar bymdon briew ne bym ioh sngew briew. U lah ban wan mynmiet mynstep ne mynsngi.

U Jisu u pynsyriem ia ka sngi ka jingwan jong u kum u nongtuh, namar un wan ban tuh ia la ki jong kat ba ka pyrthei ka dang ioh thiah lyngngai ha ki jingsngewbha pyrthei kane ka mut ba u Jisu u khun u Blei un wan ban rong noh ban tuh ia la ki jong da kaba un wan tang ha suin bneng, bad ia kane ka rukom wan kum u nongtuh, ka ktien u Blei ka ong ia ka “KA JINGRONG NOH’ (rapture).

Ha kum kata ka por ymdon ba tip, ka pyrthei kam tip ki riewstad Science technology kim tip, kan long ka jinglyngngoh bakhraw namar ka jingjah ki briew. Kita kiba shah rong noh kin long tang kita kiba la pynkhreh man ka sngi ia la ka jingim, ong ka ktien u Blei. Ki ba kum kino kita ki ban sa shah tuh ne shah rong noh? Ka ktien u Blei ka ong – “Suk uta uba sharai uba ri noh ia la ki jain kup ioh ba un iaid lyngkhuid bad ba kin iohi ia ka jinglehrain jong u. Jingpynpaw 16:15.

Kiba sharai hala ka sngi, kiba la dep sait ia ki jain kup ba tngit jong ki haka snam u khun langbrot jong u Blei, ki dei kita kein kiba suk, kiba don bynta ha ka jingrong noh, (rapture).

Kat kum ka ktien u Blei, ka jingrong noh kan jia lem bad ka jingmihpat kiba iap. Kan long ka sngi ka jingmihpat kiba iap. Kan long ka sngi ka jingmih pat bad kan long ruh ka sngi ka jingrong noh (resurrection and rapture). Ym don uba tip ia ka sngi ne ka por. Hynrei ka ktien u Blei ka iathuh ia ki dak jong ka por. Kata ka por kan jia long ha ki 3 snem shiteng ne ki 42 bnai ne 1260 sngi ba la ong da u Daniel 9:27. Kan long ka por ki jingjynjar bah (great tribulation), ka por ka jing synshar u soitan Lucifer ia ka pyrthei bad kan hap hapoh ka por ki pliang jingbitar jong u Blei, ha ka jingpyndait kaba Hynriew (Seventh Seals), ka jing mihpat bad ka jing rong noh ba la thoh ha ka Gospel u Mathaios 24:31; 1 Thessoloni 4:15-18; Jingpynpaw 7: 9-17. Kane ka dei kata ka por ia kaba u Jisu un wan kum u nongtuh ban rongnoh shatei sa suin bneng. Katei kan long ka por ka jingwan ba arsien u Jisu tang ha suinbneng, ia kaba ki khmat briew kim lah ban iohi ne ki kor ki bor kiba don ha suinbneng kim lah ban shondur, kan long ka por jingmaian ka por mihpat bad jingrongnoh sha suinbneng.

Ka por ka long hajan kein ia kiei kiei baroh ba kaba kut ka la nangjan. Ka Dak kaba shai kdar jong kine kiei kiei baroh ka long tang shu mih ka hukum ban pynieng pat ia ka Temple kaba lai ha Jerusalem. Ka Israel bad ka pyrthei ki ia ap kmang ia kata ka por ha kaba u nongshynshar lahduh jong ka pyrthei un pynmih noh ia kaba kum kata ka hukum, ia kaba u Daniel u ong – ka Jutang ba lamler. Daniel 9:27.ka Jutang kaba bad ka jingiap. Isaiah 28:15. Ka jingiateh jingiasuk (Israel Peace Treaty). Ha kaba une u nongshynshar lahduh ne u khrist lamler un rung ha kata ka Ri ba donburom, bad un pynkyllon ia shibun ki Ri ka pyrthei. Daniel 11:41.
Dei nangne kein kan sdang ka jing iaid lynti jong kiei kiei baroh. Haba shupeit ia ka pyrthei I kumba kita kiei kiei ki don hajan kein. Hynrei kita kiba la sait ia la ki jain kup kim donkam ban sheptieng, namar u Blei um shym la mang ia ngi sha kata ka jingbitar bakhraw jong u ia ka pyrthei. 1 Thessolini 5:9/ Rom 5:9.

Namar kata, “suk uta uba pule, bad kita kiba iohsngew ia ki ktien jong kane ka jingiathuhlypa, kiba sumar ia kita kiei kiei ba la thoh ha ka, namar kata ka ia (rta) ka la jan. Jingpynpaw 1:3.
“Ha khmih nga wan kum u nongtuh” Jingpynpaw 16:15.