“Nga thab met, ba nga sngew tynnad, ba ula nang ban tem”

Ka dei ka jingjia, kaba pynkyndit, ia u samla Banshem, u nongtem bom, haba u ioh ban hikai tem bom hynnin ka step, ia u myntri rangbahduh ka Ri ha Mawphlang.
Ha ka jingiakren bad U Rupang, mynta ka miet, u samla Banshem, u iathuh ba tang shu mar ia poi ha Mawphlang, U Modi, ula leit beit beit sha ka jaka ba u don ma u, katba u dang don ha ka jingiatem bom ha katei ka jaka, kum ka jingpdiang sngewbha ia u. “U wan beit sha nga, nga sangeh ban tem, nga nang mut ba u mut ban khublei kti, hynrei shim ia u dieng tem bom bad u tem ia ka bom”. “Hadien shipor, nga ong ia u, nga dang don sa kawei ka sur ba
ngan tem bad hangta, u ai ia u dieng ha nga, hynrei, nga tang shu sdang tem shi dieng ar dieng, ula shim biang ia u dieng bad ula pynbud ia kaba nga tem manga” ong u samla Banshem.
“Namar ba nga sngewtynnad ba ula nang eh ban tem, kumta nga la thab na tyrpeng jongu” ong u samla Banshem, uba don 25snem bad nga ong ruh “Ish at sha (ngam kynmaw bha)” ula ong shuh shuh.
Na ka jing iathuh jong u samla Banshem, la sngewthuh ba kaba U Modi, u lah ban bha ban tem, ka dei ka ksing iaid lynti. U bah KM Lyngdoh, President Seng Khasi Mawphlang, haba iakren bad U Rupang, u iathuh ba u don lem, ha katei ka jingpdiang sngewbha bad kaba U Modi, u lah bha ban tem bad kaba la ia thap kti da baroh, ka dei ka ksing iaid lynti bad u iathuh ruh ba U Modi, u tem ksing bad ki, kumba 4 minit eiei.