Nga sngewsih bha, ba tang na ka daw ka riam, ong u para kong Tailin

Shillong, 27 Jylliew:
Ki khubor ba kawei ka longkmie ka la shah beh na Delhi Golf Club tang na ka daw ka riam ka beit jong ka ba ka riam da ki jaiñsem ki la saphriang ha kylleng ka ri India bad ka dei ruh ka mat kaba ki khubor TV jong ka ri India ki thnam bha mynta ka sngi. U Rupang u la pyrshang ban ioh ia kren bad ka kong Tailin Lyngdoh, hynrei ki ba ha iing hasem jong ka kim don ia u nombar phone jong ka namar ba ka ju kynriah jaka sah na kawei ka jaka sha kawei pat kat shaba leit ka Dr.Nivedita Barthakur.
U Rupang u la ioh ban ia kren bad u para trai jong ka kong Tailin Lyngdoh u bah Lesterwell Lyngdoh, u bah Les u la iathuh ba ka shnong trai jong ka kong Tailin ka dei na ka shnong Ksehkohmoit ka shnong kaba don halor lum jong ka ka shnong Shyrwang kaba don ha ki thaiñ Langtor, Mairang. U la iathuh ba ka don 5 ngut ki khun bad mynta ki la heh bad ki trei la ka jong ka kam bylla. Hadien ba la khlad noh u kpa ki khun u la ong ba ka leit trei kum ka nongri khun ha ing jong ka Dr.Barthakur ha Guahati bad na uwei u snem sha uwei pat u la ong ba ka la leit sah kylleng ki jaka kat shaba leit katei ka doktor bad ka la poi sah sha Dubai, sha London. U la ong ba ki don tang u phone nombar uba ka bat ha ka por ba ka sah ha Dubai, hynrei mynta pat ba ka la wan sha Delhi kim don phone nombar shuh bad ki ap sa tang ba kan phone hi ma ka. U bah Les u la ong ba ka ju wan shong tang shisien ha ka shisnem.
Kham hadien u bah Les u la pyntip biang da ka phone sha u Rupang ba ha ka por 10 baje eie mynta ka miet ka kong Tailin ka la phone sha u, hynrei ym shym la ioh pat ia u nombar phone jong ka namar ba ka mobile jong ka ka la sniew bad ka shu kren da ka mobile jong kiwei pat, hynrei ka la iathuh pat ba mynta ka la don ha nongbah Guahati ha ing jong ki trai ing ba ka sah.
Wat la ym shym la ioh ia kren bad ka kong Tailin hynrei ka la phah ktien ha u para jong ka ban iathuh ha u Rupang ba ka jingjia ka long beit thik kumto kumba ka la batai ha ki khubor TV ba la shim interview ia ka.
Kum u para u bah Lestarwell u la pynpaw ka jingsngewsih kaba khraw halor katei ka jingjia kaba la jia ia ka hynmen jong u ba ka la shah beh tang na ka daw ka riam ka beit, “Nga sngewsih bha ban iohi ha kotkhubor kumto ba tang na ka daw jong ka riam ka beit ba ka phong jaiñsem, nga sngew ba ngi ki nong India ngi long laitluid ha India ban riam ha la ka jong ka riam tynrai jong ngi, lada ki beh kumto balei pat ki khot ban leit sha katei ka jaka” ong u bah Lestarwell haba ia kren bad u Rupang.