Nga sngewdei kumba dawa ki longkmie, ban don bynta, ha kaba jied Rangbah Shnong bad ban long dkhot ha ka EC Dorbar Shnong

Sphondar Thongni Thiepdiengngan Kenïong

Kumba nga la ïohi ha ki kot khubor ba na ka Liang jong ki Seng kynthei ki la leit dawa na u CEM ka KHADC ban shah ïa ki kynthei ruh ban ïoh bynta lang ha kaba jied ïa u u Rangbah Shnong ne u Myntri,u Sordar Shnong ha ki shnong baroh.Kumjuh ruh ban long dkhot ha ka Executive Dorbar shnong.katkum ka jingïaid jong ka por la sngew dei ba ki kynthei ruh kin ïoh ka juh ka hok ban jied Rangbah Shnong, Myntri ne Sordar Shnong bad ban ïoh ka hok ban don bynta lang ha ka Executive Dorbar jong ka shnong.Ha kine ki sngi ba mynta ïa ki kynthei ruh la shah ïa ki ban long ki nongïalam bad ki khlieh duh ha ka shynshar Khadar bad ha ki office sorkar.

La don bun ki kynthei kiba la long kum ki Nongïalam ba hakhlieh duh jong ki Ri kum ki Minister,ki Prime Minister bad ki President jong ki Ri ka pyrthei.Bad ban bat ïa ki post kiba heh ha ki office Sorkar kumjuh kum ki shynrang.Haba kat kine ki post kiba heh ki lah ban bat bad ban long ki khlieh nongsynshar,kan eh aiu tang ban don bynta ha ka Executive Dorbar jong ka Shnong. Ha ki por mynshwa ïa ki kynthei ki ju kheiñ poh bha ha ri India jong ngi ruh Shuwa ka jingwan synshar jong ki phareng.Kim shah ïa ki kynthei wat ban pule ha ki kyrdan kiba kham heh.Bad Kim shah ïa ki kynthei ban don bynta ha ka imlang sahlang.Ha ri Khasi jong ngi ruh ki ju ong ba ka kynthei ka dei ka, ‘Shibor’ bad ïa ki shynrang ki ju ong , ‘Khatar bor’ .Bad ha ka Dorbar shnong ruh naduh ki por hyndai ym ju shah ïa ki kynthei ban shong dorbar. Katkum ka jingïaid jong ka por ki kynthei ruh ki la nangkiew ha kiba bun ki liang,Bun ki kynthei kiba la nang la stad, kiba shemphang bad kiba ïohi jngai.Ka pyrthei mynta ka burom bha ïa ki kynthei ha ka imlang ka sahlang ka jingdon jong ki Seng longkmie ha ki shnong ki thaw ha ka imlang ka sahlang ka ai ka jingïada bad ka jingshngaiñ ïa ka imlang sahlang khamtam ïa ki kynthei na ka jingshah banbeiñ bad shah lehbeiñ jong ki kynthei khynnah bad ki longkmie.

Kumta la sngew dei ba ha ki Dorbar shnong ruh ban ailad lang ïa ki kynthei ruh ki longkmie ban ïa kren ban ïatei ïa ki kam jong ka Shnong ruh ban ïoh ka hok ban Jied Rangbah shnong bad ban long Dkhot Executive Dorbar jong ka Shnong namar ha kine ki sngi kumba nga la kdew shakhmat ba bun ki kynthei kiba la kham stad kham shemphang wat ïa ki rangbah ruh bad kiba ïohi jngai na ka bynta ban kyntiew ïa ka Shnong ka thaw ka imlang ka sahlang.Ngi dei ban burom ïa ki kynthei bad ban sngap lang ïa ka jingaijingmut ne jingpyni jong ki kynthei ban tei ïa ka Shnong ka thaw ka imlang ka sahlang na ka bynta ka jingbha lang. Watla da ngim pat sngew dei ban Jied ïa ki kum ki Rangbah,ki Myntri ne ki Sordar Shnong ruh hynrei ngi dei ban ailad lang ïa ki kynthei ba kin ïoh ka hok ban shong Dorbar ban ai ka juh ka hok ïa ki ba ki lah ban kren ban pyni ïa ka jingshisha kiba lah ban kyntiew ïa ka Shnong ka thaw ka imlang ka sahlang.