“Nga shu kwah iehnoh, ngam don da kumwei ban kren”

Shillong, 18 Risaw:
U bah JA Lyngdoh, MLA barim jong ka Mawphlang bad uba dei ruh u Vice President jong ka UDP, ula iaid shakhmat ha kine ki sngi, na ka bynta ban kanbas ialade, na ka bynta ka elekshon 2018 na ka Shillong North.
Haba iakren bad u nongthoh khubor mynta ka sngi, U bah JA Lyngdoh, ula ong “Ngan nym ong em” bad ula ong biang “Ia ka Shillong North hi baroh kawei”. Haba kylli, balei ba ula iehnoh ia ka seng UDP, ula ong “Nga shu kwah iehnoh, ngam don da kumwei ban kren”. U bah Dip, uba dei U Vice President jong ka UDP, la sngewthuh ba un sa phah ia ka shithi weng jinglong dkhot ialade na katei ka seng trai ri ha ki sngi ki ban sa wan.
Ki lad khubor, ki iathuh ba utei u rangbah, un lah ban iakhun na ka tiket BJP, ha ka elekshon ka ban wan na katei ka Constituency.
Ha kawei pat ka jingpynmih khubor, la iathuh ba mynta ka sngi U Bah JA Lyngdoh u ba ju shait khot ieid u bah Dip u ba dei ruh u MLA barim ha Mawngap na ka seng UDP,u la iehnoh ia ka seng UDP mynta ka sngi ha ka jingialang kaba la long ha Mawngap.
Ia kane ka jingialang ha kane ka sngi la pyniaid da u bah Shake Sphere Laloo ha ka jingiadon ryngkat lang u General Secretary bah Kester Warjri.
Kat kum ka kyrwoh khubor ba la pyllait da u bah Kester Warjri general Secretary UDP Mawphlang,la ong ha kane ka jingialang la ioh ia jingkren na ki riewpawkhmat kiba ha ka konstitwensi,baroh ki nongkren kiba la ai ia ka jingkren jong ki, ki lapynpaw ia ka jingsngewnguh ia u bah Dip namar ki kam kiba radbah kiba u la leh ha ka konstitwensi ha ki 15 snem ba u la bat kum u MDC bad MLA.
Ki nongkren ha kane ka sngi ka la pynpaw ruh ba U bah Dip u laleh shitom ban ban wanrah ki kam pynroi pynpar ha ka konstitwensi la ka long ha ka pule ka puthi, ki hospital ki umbam um dih ki surok ki lynti ki synkien bad ki wei ki wei. Khamtam eh u bah Dip u la wanrah ia ka PHC, CHC, ka Iew Mawngapka Indoor stadium, ka surok rong naduh Laitmawsiang shaduh Nongspung,ka surok rong naduh Tyrsad shaduh Mawsadang. Ki Centre ialeh eksamin jong ki khynnah Matrik ha St Paul Marbisu, Nongspung bad Tyrsad bad kiwei kiwei ki kam pynroi kiba u la ialeh shitom ban pynioh na ka bynta ka konstitwensi. Kat kum ka kyrwoh khubor la ong biang,u bah Dip u long u briew u ba phylla tam na ki nongmih khmat baroh jong ka konstitwensi,kata naduh u snem 1998 haduh u snem 2013 kaba u la bat kum u MLA bad MDC u la pynsah jingkynmaw lut ia baroh ki paidbah ka konstitwensi.