Nga shu iohsngew ia ka khubor: Dr Bom Halor ka jingiakhih pynkylla nongialam Congress

Shillong, 21 Naitung:
U MLA ka Congress na Umsning Konsti wensi Dr Celestian Lyng doh uba ju khot Dr Bom u la ong ba um ioh jingtip eiei ia ka jingiakhih pyn kylla nongialam ha ka Party Congress hynrei u shu iohsngew tang na ki khubor sharum shaneng.
“Nga shu iohsngew ia ka khubor nga sah ha Nongpoh”, la ong u Dr Bom uba dei uwei na ki MLA ba iajan bha bad u Myntri Rangbah barim uba dei ruh u president jong ka MPCC u Bah DD Lapang.
Haba kren mynta ka sngi bad u Rupang u Dr Bom u la ong ba um pat ioh khubor eiei shaphang kane ne lehse kam pat poi sha u. Watla um kyntait ne pdiang ba ka don shisha ka jingiakhih ban pyn khyllem nongialam hapoh ka party. “Nga dei tang u MLA ba dang jop shisien, ngam pat tip bha ia kane”, la ong u Dr Bom.
Hynrei ha kine ki sngi, la ioh khubor ba don ki MLA ka Congress kiba la iakhih sharum shaneng ban pynkylla nongialam noh ia u Dr Mukul Sangma da kaba bujli da uwei pat. Ka jingiakhih ka la kham jur mynta, hadien ba ki MLA kiba pyrshah ia ka jinglong nongialam u Dr Mukul ki la iatreilang bad u MP ka Shillong u Bah Vincent H Pala da kaba ki la bynshet ba un pynking ia ka shalyntem kane ka jingiakhih.
Ia ka sorkar MUA-II ba ialam da u Dr Mukul naduh u 2013, la kyrshan da ki MLA shimet, bad NCP. Ka Congress ka don 29 ngut ki MLA ha ka iing kaba 60 ngut.
Hynrei ha kawei ka khubor, la iathuh ba u Myntri Rangbah uba la tip ia kane ka jingiakhih sop sop ki MLA napoh napoh ban pynkhyllem ia u, u la pynkhreh ban pynhiar shuki noh ia kito ki myntri kiba kham saidlah ia u bad ban thung da uwei pat kumba la leh ha u snem 2011 ha ka por ba ka la don teng ka jingpyrshang ban pynkhyllem ia u hynrei kim lah.