Nga shu ai jingmut, ym ba nga khang pyrshah:Sanbor

Shillong,20 Jylliew:
U bah Sanbor Shul lai MLA/MDC ka thain Laban, ha ka jingia kynduh bad ki nong thoh khubor mynta ka sngi u la pynshai ba ki jingkynnoh ba u la khang pyrshah ia ka jingkhang dukan ka KHADC ha Laban kam long kaba shisha , hynrei ha katei ka sngi ba ki pulit ka KHADC ki la wan ban khang dukan ha Laban u la ai shu kylli na ki hato ki la kynjoh ktien ne-em ia ki bor shnong shuwa ba kin leh ia katei ka kam hapoh shnong. U bah Sanbor u la ong ba ha katei ka sngi u la shu ai jingmut ia ki pulit Enforcement ka KHADC ba kan kham bha lada shuwa ban leh ia katei ka kam ba kin kynjoh ktien lane pyntip sha ki bor shnong.
U la ong ruh ba kum u nongmihkhmat u shu kwah ban ai jingmut, khnang ban lait na kino kino ki kynrum kynram. “Ym dei ba nga khang pyrshah lane leh donbor hynrei nga shu kren bad kylli na ki hato ki la pyntip ne em sha ki bor shnong shuwa ban leh ia katei ka kam.
U bah Sanbor u la iathuh ruh ba hadien ba ki la kyrngah ba kim pat shym la pyntip sha ki bor shnong, u la shu ai jingmut ia ki ban leh ia katei ka kam da ka jingiatiplang ki bor shnong, namarba ka KHADC ruh ka ia treilang bad ka shnong lyngba ki nongialam shnong.
Ha ka juh ka por, u bah Sanbor u la ong ba ka section 3(e) jong ka Trading by Non Tribal Regulation Act ka la kren shai ba ka ka Dorbar shnong ka dei ban don bynta lang ha ka jingleit khynra Trading License lane ban ai laisen thymmai sha ki bar jylla kiba seng kam hapoh ki jaka ba hap ha ka jingpeit ka KHADC. U la ong ruh ba dei hadien ba la ai jingmut ba u Under Secretary ka KHADC u la phah ia ki shithi jingtip sha ki Dorbar Shnong.
Lah ban pynkynmaw ba ha ka 17 tarik , ki pulit Enforcement ka KHADC ki la leit sha Laban bad Laitumkhrah ban khang ia ki dukan bar jylla , ki bym don Laisen Khaii, hynrei ha katei ka jingleit khang dukan na ka liang u EM ka Trade u bah Latiplang Kharkongor , u la ong ba ka jingthmu ban khang dukan bar jylla bym don Laisen ka la pulom noh ha Laban namar ka jingwan tuklar u MLA/MDC katei ka thain u bah Sanbor Shullai , ha kaba u EM u la iathuh ba u bah Sanbor u la ong ba ki hap ban pyntip shuwa sha u bad sha ki bor shnong.
Lah ruh ban pynkynmaw biang, ba na ka liang u EM ka Trade ha ka jingiakynduh bad ki nongthohkhubor dang shen , u la ong ba kam dodnkam ia ki bor ka KHADC ban pyntip sha ki bor shnong lane sha kino kino ki nongmihkhmat ha kaba ia dei bad katei ka jingleit khang dukan bar jylla, bad ka ain ruh kam shym la ong ban pyntip shuwa sha kita.