“Nga shngain ban shong hajan u bah Sanbor”, ong u Dr Don ia u bah Sanbor

Shillong: U MLA ka BJP na South Shillong konstitwensi u bah Sanbor Shullai, ula pynkynmaw ia ka jingkren u Dr Donkupar Roy ha ka por ba u iashong lang ha syndah ha ïing dorbar thaw ain ha ka samoi jinglong MLA ba la dep.

Haba shim bynta ha ka jingkynmaw burom ia ki nongialam sain pyrthei ba la khlad noh ha ïing dorbar, u bah Sanbor ula pynkynmaw ia ka jingkren u Dr Donkupar ia u kaba ong, “Nga sngew shngain, sngew ioh bor ban iadon hajan bad u bah Sanbor namar ba u dei u riew ialeh”.

U bah Sanbor ula pyniahap ia kane ka jingkren u Dr Donkupar ia ka jingialeh jong u pyrshah ia u Manas Chaudhary u MLA barim ka Mawprem, uba iakhun pyrshah ha ka elekshon MLA na South Shillong.
Haba pynpaw ia ka jingsngew lem ia ka jingkhlad u Dr Donkupar Roy nalor kiwei ki nongialam ka ri kynthup ia u Arun Jaitley, ka Sushmita Swaraj, u bah Sanbor u la ong, ” U Arun Jaitley, ka Sushmita Swaraj ki leit sha hima u blei hynrei u Chidambaram u shakri ha ka hima ki ksuid ha phatok Tihar”.
U la pynkut da kaba kitbok ba ka mynsiem jong kine kiba khlad kan shong jahthait ha ka hima u blei.