Nga shah khot ha ki ba ha ing, ngan leit sha Mawkyllei:L.G Nongsiej

Shillong, 25 Nailur:
Lashai ka sngi ka 26 tarik u nailur kan dei ka lyngkhuh sngi iap ba nyngkong jong u radbah ka HSPDP u bah Hopingstone Lyngdoh. Ia katei ka sngi rakhe lyngkhuh sngi iap yn pynlong ha ki ar tylli ki jaka ha Nongstoiñ, kawei dei kaba yn pynlong da ka HSPDP Nongstoiñ bad kawei pat dei kaba yn pynlong da ka HSPDP Pariong.
Haba ia kren bad u Rupang u MLA ka Nongstoiñ u bah Daiostar Jyndiang u la ong ba katei ka jingrakhe kan sdang da ka jingleit buh syntiew ha ka por 8 baje mynstep ha ka shnong u Maieit Hoping ha Mawkyllei bad ka prokram ha Nongstoiñ kan sdang ha ka por 10:30 baje mynstep. U la ong ba ha katei ka jingrakhe ka HSPDP ka la khot sngewbha ia baroh ki seng saiñpyrthei bad baroh ki Sengbhalang ban ia pynshngaiñ lang.
U Rupang u la ioh ia kren ruh bad u bah L.G Nongsiej MDC ka Nongstoiñ u nongbud jong u Maieit Hoping ha ki por ba u dang don ha kane ka sla pyrthei. U bah L.G Nongsiej u la jop ia ka elekshon MDC na ka seng HSPDP ha ka por ba u ia treilang ryngkat ryngkat bad u bah Hoping , hynrei mynta um don shuh ha ka seng HSPDP, la kylli na u hato na ka liang jong u pat kum u nongbud ba ha syndah jong u Maieit u don ne-em kano kano ka jingthmu ban kynmaw burom ia utei u nongialam jong u bad ka Nongstoiñ hi baroh kawei.
“Nga la shah khot sngewbha ha ki bahaing hasem jong u Maieit,lashai ngan leit sha Mawkyllei naduh mynstep ban leit buh syntiew” u la ong. La kylli biang hato un leit ne-em sha ka jingrakhe kynmaw burom sha Nongstoiñ , u la ong ba lada ka por ka dang shah un leit. La sngewthuh ba lashai ka sngi u bah Nongsiej un kham pynlut ia ka por jong u ha Mawkyllei ryngkat bad ki bahaing hasem jong u Maieit Hoping.
U rupang u la ioh ban ia kren ruh bad ka kong Fenela L Nonglait , ka pyrsa jongu maieit Hoping kaba la shah beh seng na ka seng HSPDP ban kylli hato kaei ka plan ban rakhe kynmaw ia u Maieit ha ka sngi lyngkhuh snem ba nyngkong jong u, ka la ong ba mynta ka don ha ka met ka bym shait bym khlaiñ hynrei ki bahaing hasem jong ka kin ia don ryngkat lashai ka sngi sha Mawkyllei.