Nga phet na ka ARPA ban ioh ia ka EC ba skhem:Grace

Shillong, 17 Jymmang:
Ka MDC ka Nong shken ka Kong Grace Mary Kharpuri ka la kam ba ka la phet sha ka People Democratic Forum (PDF) ba ialam da ka Congress namar ba ka kwah ban ioh ia ka Executive Committee kaba skhem.
 ‘Nga don bad ka ARPA haduh ka khyllip mat ba khadduh. Nga shim ia ka rai ban leit noh sha ka PDF hadien ba la rung ha ka iing dorbar namar ba nga tip ba kan don ka jingiakhaid mar 15 ngut ki MDC lada ka  chairman ka Kong Teilinia Thangkhiew kan iehnoh.  Kane kan wanrah ia ka jingbym skhem namar ba kan nym don shuh ka dorbar kyrpang ban iatynjuh  bor hadien ba la iehnoh ka chairman”, la kam ka kong Kharpuri.
Ka KHADC kam shym la don u Deputy Chairman hadien ba la iehnoh da u MDC ka Sohryngkham. Ka la kam ba ka jingbym lah ban pynlong ia ka dorbar kyrpang kan pynmih ia ka kynrum kynram bad kan wan ka synshar Administrator ha ka Council.
 ”Ym don ba kwah ban iohi ba ka synshar administrator kan wan ha ka Council. Namarkata, nga la shim ia kane ka rai na ka bynta ka jingbit jingbiang jong ka Council”, la ong ka MDC ka Nongshken.
Hynrei ha kawei ka liang, la iathuh ba ka Kong Kharpuri bad u James Sylliang ki la phet noh na ka ARPA hadien ba kim sngew ioh shuki EM.