Nga pan tiket MP na Shillong, pynthikna u Bah Ronnie

Shillong, 29 K’lyngkot:
U MLA ka Congress na Mylliem u Bah Ronnie V Lyngdoh u la pynthikna ba u pan tiket na ka party na ka bynta ka elekshon Lok Sabha na Shillong Parliamentary seat.
Haba ia kren mynta ka sngi Balang, u Bah Lyngdoh u la pynthikna ba u don ka jing kyrmen ba un ioh ia ka tiket na ka party ha kane ka kynti.
“Kane kam dei kaba kynsan kynsan. Ka jingiakren ia ka party sha phang jong nga ban iakhun ia ka Lok Sabha elekshon ka la sdang la kham slem”la ong u Bah Ronnie.
U la ong ba kum u riew kohnguh sneng jong ka party, u long uba kloi ban shim ia ka jingkitkhlieh ba la bynshet da ka party.
“Kum u nongialam paidbah, ngi dei ban long ba la khreh ban shakri ha kano kano ka kyrdan”, la ong u MLA ka Mylliem.
Lem bad u Bah Ronie, la don lai ngut kiwei pat kiba pan tiket na Congress na ka bynta ka Shillong Lok Sabha constituency kynthup u Bah MP Vincent Pala u MP ba mynta, u Bah John Kharshiing bad u Lamphang barim u Bah Charles Pyngrope.
Ha kajuh ka por, u MLA ka Mylliem u la iathuh ba u la rai ban nym iakhun ia ka MDC ha kane ka kynti.
“Nga la shim ia kane ka rai ban nym iakhun ia ka MDC elekshon hadien ka jingialang bad ki nongkyrshan jong ka Mylliem Block Congress Committee ha kane ka sngi Hatmajai. Nga la ong ia ki ba ngan pynleit jingmut kham jylluid ha ka kam MLA,” u la ong.
U la ong ba u la pyrkhat nyngkong ba un iakhun ia ka elekshon namar ka jingpynbor ki nongkyrshan.
“Nga sngew kmen ba ki paidbah ki shah ia nga ban nym iakhun MDC. Ki nongialam ka party ki la pdiang ia ka rai jong nga”, la ong u bah Lyngdoh.
Lyngba ka jingkynran noh U bah Ronnie, la rai ban pynialeh mynta ia U bah Jona Syiem, uba dei U Vice President jong ka Mylliem Youth Congress Committee (MYCC), ba un iakhun ia ka elekshon MDC na katei ka Seng na Mylliem Constituency. U la pynpaw ba ka Congress kan jop beit ha kane ka kynti na Mylliem.
Hynrei, kane ka rai jong u MLA ka Myllem ka la long ka jingmyntoi ia kiwei ki nongialeh kynthup ia ka MDC ba mynta ka Kong Teilinia Thangkhiew ban iakhun na HSPDP bad u nongialam barim ka KSU u Bah Hamletson Dohling ban iakhun na UDP.