Nga lah ban sa shah pyniap ha kawei ka sngi, ong U Rahul Gandhi

Churu (Rajasthan),
23 Risaw:
U Rahul Gandhi, uba dei u nongialam ba rangbah jong ka seng Congress, ula kynthoh tyngeh mynta ka sngi, ba ka BJP, kaba dei ka seng, kaba pyniashut jaitbynriew, ka dei kaba la pynjot ia ka ri baroh kawei bad ula ong shuh shuh, ba kumba ka kmie rad jong u, ka la iap bad u kpa jong u, ula iap bad u ong shuh shuh ba wat ma u ruh, un lah ban mad ha kajuh ka apot. U Rahul, uba dei U Vice President jong ka seng Congress, ula ia thuh ba haba u leit jngoh ia ki jaka jing ia kynad ha Muzaf farnagar, kaba ha Uttar Pradesh, ha ki katto katne bnai mynshwa, ula iakren ia baroh arliang ki Hindu bad ki Muslim, kiba la iathuh ia ki jingeh ba ki iakynduh ha kitei ki jingjia jong ka jingiakynad jaitbynriew.
“Nga sngew kumba nga iohi ia ka khmat ba sngewsih jongnga hi, haba nga iohi, ba ki iam pait dohnud bad ka dei na katei ka daw, ba nga long pyrshah ia ka jingtreikam jong ka seng BJP. Ki leh aiu, ki buh ia ka Muzaffarnagar ha ka jingkul mar, ka Gujarat ha ka jing kulmar, ka UP ha ka jing kulmar bad ka Kashmir ruh ha ka jingkulmar bad kane ka la pynjot ia ka Ri”, ong U Rahul Gandhi.
“Ka kmie rad jongnga, ka la shah pyniap. U Kpa jongnga ula shah pyniap bad manga ruh, nga lah ban sa shah pyniap ha kawei ka sngi. Ngam salia bad katei ka dei ka jingkren kaba wan na ka dohnud jongnga” ha kaba U Rahul ula smai ba un ialeh pyrshah ia ki buit sain pyrthei jong ka BJP.
Ka Indira Gandhi, ka la shah pyniap ha ki nongbud jongka, kiba dei ki jaitbynriew Sikh, ha ka por ba ka jubor bha ka kam pyntriem jong ki lehnoh ha Punjab,katba U Rajiv Gandhi, ula shah pyniap ha ki ehrang LTTE bad u iathuh shuh shuh, ba ula iakynduh dang shen ia U MLA na Punjab, ha kaba ula iathuh ba utei u MLA, ula byrngem, ba lada dei ba ki ia kynduh 20snem mynshwa, un jin da la pyniap ia utei u nongialam ka Congress.