Nga la thep kam ha shibun ki tnat sorkar, hynrei nga shah kyntait, ong u samla uba tei ia ka jaka shangkai pyngngad ha Pynker ‘C’

Nongpoh:Uwei u samla uba la tip kum u Kolshi Kathak na ka shnong Pynker ‘C’, ka shnong kaba don ha ka thain Umtyrnga ha Ri Bhoi, mynhynnin ka sngi, u la lah ban plie paidbah noh ia kawei ka jaka shangkai pyngad, kaba u la shna hapoh katei hi ka shnong.

Katei ka jaka shngaikai pyngad, kaba la tei da utei u samla ha ryngkat ka jingiarap ki katto katne ki paralok jong u, ka dei kaba la tip kum ka Mribu Jungle Camp, ha kaba ka dei ruh ka jaka ba ki paidbah ki lah ban leit shangkai pyngad bad nalorkata, ki don ruh sa ki jaka sah ha ki iingtrep bad ki jaka sah ha ki Tent House.
Ha katei ka sngi, ba la plie paidbah ia katei ka jaka shangkai pyngngad, la sakhi ruh da ka jingdon u Fr. Kmenlang Nongrum Parish Priest Byrnihat Parish, uba la shim ia ka bynta ban kyrkhu kyrdoh ha ryngkat ka jingduwai, nalorkata la sakhi ruh da ka jingdon ki kmie ki kpa jong utei u samla lem bad ki riew rangbah jong katei ka thain.

U samla Kolshi Kathak, haba kren sha ki lad pathaikhubor, u la ong ba ka daw kaba la pynlong ia u ba un phaikhmat ban tei ia katei ka jaka shangkai pyngad, ka dei hadien ba u la shah kyntaid haba u leit ban thepkam ha ki tnat treikam sorkar bapher bapher, kumta haba u la mad ia kaba kum katei ka jingshah kyntaid, ka la pynlong ia u ba un shim da ka ram, ban shna ban ia katei ka jaka, tad haduh ba kan da kylla long kum kawei na ki jaka shangkai pyngad ba itynnad eh ha katei ka thain.