Shillong: U President ka BJP Meghalaya u bah Ernest Mawrie, u la ong ba u la iakren teng ia ka kam iabhah shuki ki MLA ka BJP ha kane ka jylla, hynrei u la kam ruh, ba um tip thikna ia ka jingiakren ha ka por ba thaw iaka sorkar MDA namar ba um pat dei u president ha katei ka por.
Haba kren sha ki lad pathai khubor, u bah Ernest u la ong, “Nga la pynsngew ia ki nongialam ka party ha Delhi hynrei ngin sa peit ha kine ki sngi”.
U la ong ba ka sorkar MDA kan sa dap ar snem shiteng ha ki khyndiat bnai ban wan bad yn sa iakren bha ia kane ka jingbhah shuki ki MLA ha kine ki sngi.
“La iakren ia ki nongialam ka seng kmie halor ka jingiabhah shuki u bah AL Hek bad bah Sanbor Shullai bad ka MDA ka dang don sa kumba 4 bnai ba kan dap pura 2 snem shiteng bad ngin sa kren ha kine ki sngi”, la ong u bah Ernest.
Na ka liang u bah Sanbor u la kam kumba la paw ha ki lad pathai khubor ha kine ki sngi, ba ka la don ka jingpynbeit ban iabhah shuki mar ar snem shiteng bad u bah AL Hek ha kane ka sorkar synrop MDA ba ialam ka NPP hynrei la iohi ba u bah Hek pat u la kyntait ba kan don kum kata ka jingpynbeit.
Ka BJP ha kane ka jylla, ka don 2 ngut ki MLA kaba kyrshan ia kane ka sorkar MDA bad ka ioh shuki myntri kawei katkum ka jingiateh.
Haba kyntait ba um tip bha ia ka jingiakren ha ka por ba thaw ia ka MDA namar ba um pat dei u president, u bah Ernest u la ong, “Naduh ba sdang ka sorkar, ngam pat dei u president ha kato ka por, ba dang dei u bah Shibun Lyngdoh bad ngam pat don ha ka jingiakren bad ngin sa peit. Mynshwa nga la iakren ia ki nongialam ha Delhi”.
Phi don ban ong eiei?