Nga la leit rah ia kane ka phang, tangba ym pat ioh iatai: Vincent Don jingkyrmen ka ktien Khasi, ha ka 8th Scheduled

Shillong, 11 Nailur:
Ka ktien Khasi, ka dei kawei na ki jait ktien ba don ha ka thup kyrteng ban rung ha ka 8th Scheduled jong ka ri India na pdeng ki laiphew phra tylli ki jait ktien ki ba dang iakhun ban ioh rung ha kane ka khyrnit jong ka riti synshar.
Ia kane la ong da u MP ka Shillong u Bah Vincent H Pala mynta ka sngi ha ka jingplie ia ka jingrakhe ia ka jingdap 35 snem ka Khasi Authors Society (KAS) kaba la long ha Don Bosco Youth Centre, Laitumkhrah Shillong.
“Kumba long mynta la don 38 tylli ki jait ktien ba dang iakhun ban iohrung ha kane ka khyrnit ba phra ka riti synshar ka ri, nga la iakynduh ia u Myntri ka sorkar India ba peit ia kane”, la ong u Bah Pala bad u la bynrap ba ka ktien Khasi kadei kawei kaba don hakhmat eh ban ioh rung.
“Nga la leit rah ruh ia kane ka phang ha Parliament, tangba ym pat ioh iatai nia namar ba ki dang iatai ia kiwei pat ki sobjek”, ong u Bah Pala.
“U phadar Sngi u la ju ong ianga ba lada ka ktien Khasi ka im, ka jaidbynriew ruh ka im”, u la ong.
U Bah Pala u la iathuh ba ia ka Khasi dikshoneri mynta ruh la pynrung ruh ha ki internet bad lah ruh ban peit ha ki mobile, ym tang ia ka Dikshoneri hynrei wat ia ka bible khasi rung la lah ban lap ha ki internet ha kaba lah ban ruh ban pule ha ki mobail ym da donkam shuh ban da rah ha ki pla.
U Bah Vincent Pala u la ong ba na ka liang jong ka KAS ruh kidei ban trei shitom bad kidei ruh ban thoh ia ki kot Khasi halor ka riti Dustur .
Shwa ia kane la ioh ka jingkren na u General Secretary ka KAS u Bah P Kharshiing, u la ong ba ia kane ka Khasi Authors Society (KAS) la pynneh pynsah da ki khyndai ngut ki nongthoh kot Khasi bad hapdeng kine ki jingiaid lynti ba 35 snem ka seng, la don 95 ngut ki nongthoh kot khasi kiba la pyniasoh ialade bad kane ka KAS. Hynrei napdeng kine 32 ngut ki dkhot jong kane ka KAS ki la khlad noh bad mynta ha kane ka seng baroh ki iadon 63 ngut ki dkhot.
Ha kane ka sngi plie ia ka jingrakhe, la pynlong ruh ia ka jingpynkup burom ia 7 ngut ki khynnah ki ba la ioh heh mark ha ka sobjek Khasi ha kane ka eksam jong ka HSSLC bad ka SSLC 2014.
Kiba la shah pynkup burom ki kynthup ia u Rebinroy Rynjah na St Gabriel HSS Laimer u la ioh 94 mark ha ka SSLC, u Kalkedon Mylliemngap na Kyntiew Shaphrang HSS, Laitlyngkot u la ioh 94 mark ha ka SSLC, ka Evalca Khongsni na St Snthony HSS Pynursla ka la ioh 86 mark ha ka HSSLC, ka Embhahlang Dkhar na Ramkrishna Sohra ka la ioh85 ha ka HSSLC, u Federick Sawkmie na St Anthony Shillong la ioh 88 mark ha ka HSSLC, ka Shishalinda Lyngkhoi na St Anthonys Shillong 90 mark ha ka HSSLC bad ka Saphibanrisa Shabong na Meghalay Police Public School Shillong 97 mark ha ka ICSE.
Ha kajuh ka por u Bah Pala mynta ka sngi ruh u la pyllait ia 4 tylli ki kot Khasi ki long ka ‘Iadaw Masi’ ba la thoh da u Bah MM Thaiang, ‘Na ki kyntien ba la lumlang’ ba la thoh da ka Kong Lucky Kharpuri, ‘Ki mrad khlaw Meghlaya’ da u Bah Shiningstar Laloo bad ‘Ki nongthoh kot Khasi bynta-III’ da u bah Kitbor W Nongrum.