Nga la ïoh kabu ban ïoh jinghikai na u Bah S D Khongwir, ong u Conrad

Shillong:U Myntri Rangbah ka Jylla Conrad K Sangma ha ka sngi Ba-ar, ula leit ai khublei burom ba khatduh ïa u Symbud Myntri Rangbah barim ka Jylla Bah Standlington David Khongwir, ha ka Ïingsah jong u ha Mawlai Nonglum mar pyrshah ka madan Weiking.

U Bah SD Khong wir ula khlad noh mynta ka step ha NEIGRIHMS Hospital ha ka rta ba 90 snem hadien ka jingpang kaba la ban ia u u la kham slem.
Haba pynpaw ïa ka jingsngewsih halor ka jingkhlad u Bah Standling, u Myntri Rangbah ula pynpaw ba ka Jylla ka la ithuh ïa u Bah Standling kum uwei na ki riew rangbah uba la noh shibun eh ka synniang ïa ka constituency bad ïa ka Jylla baroh kawei.

“La ju tip ia u (Standling) kum u briew uba ki paidbah ki ieid bad burom bha, kane ka la paw na ka jingïoh ïa ka jingkyrshan wat hadien ba um long shuh u MLA, wat la katta ka jingkyrshan, ka jingieid na ki paidbah ka la phalang shai ba u dei u Nongïalam ba kumno,” ong u Conrad haba ai khublei khatduh ïa une u Symbud Myntri Rangbah barim ha ka Ïingsah.

Haba pynpaw ïa ki jingïakynduh bad ki jingïoh ïakren ïakhana lem bad ki jingïoh ïa ki jingnang jingtip na u (L) Bah Standling, u Conrad ula ong, “Nga la ïoh ka lad ban ïakren, ïakynduh bad ïatrei lang bad u ha ki snem ba la leit noh. Wat, ha ka por ba u dei u Rangbah Shnong ngi la ïakynduh la katto katne sien. Namar kata, nga la ïoh bha ka kabu ban ïoh jinghikai na u, bad ban ïoh ïakren ïasyllok ïa shibun kiei kiei,” ula bynrap.

Haba thoh ha X, u Conrad ula ong, “Nga ai khublei burom ba khatduh ïa u Symbud Myntri Rangbah barim u Bah Standlington D Khongwir ha ka Ïingsah jong u. Na ka bynta ki paidbah ka Jylla bad khamtam eh ki paidbah ka Mawlai, ka jingkhlad noh I Parit Standling ka dei ka jingduhnong kaba khraw ïa ka imlang sahlang”.
U Conrad ula kynmaw ruh ïa ki synniang jong u kum u Rangbah Shnong haduh 55 snem bad ka jingtreikam jong u na ka bynta ka roi ka san jong ka Mawlai kum u President ka Mawlai Town Dorbar.

Ka jingleit on tep burom ia kaba sah ka met jong utei u rangbah, kan long ha ka 24tarik Naiwieng 2023, ha U Lum Jingtep Ka Balang Mawlai Presbyterian, ha ka por 12 baje noh phai sngi na iing sah jongu ha Mawlai Nonglum mar pyrshah bad ka Madan Weiking Jaiaw.