Shillong: Ka MDC jong ka Mylliem konstitwensi ka kong Teilinia Thangkhiew, kaba dei ruh ka Deputy Chief Executive Member ka KHADC, ka la ong ba ha ka jinglong MDC jong ka kam shym la kyntiap seng kumba long kiwei pat ki MDC bad ka jingphet jong ka na ka HSPDP ka dei hadien ba la kut ka samoi treikam kaba 5 snem. “Nga la iaineh ha ka HSPDP haduh ba kut ka 5 snem, nga la shong ha ka liang synshar, nga la shong ruh ha ka liang pyrshah hynrei nga iaineh ha kaParty bad dei mynta ba la kut ka 5 snem ba nga leit noh shawei” ong ka kong Teilinia Thangkhiew.
Halor ka jingleit rung jong ka sha ka PDF ban ia treilang bad u MLA ka Mylliem u bah Hamlet Dohling uba dei ruh u para marjan jong ka, ka kong Teilinia ka la ong ba kane ka dak ka jingiatylli bad u MLA un ia treilang bad ka MDC. “Ngi ju ong ba ki Khasi kim lah ban ia tylli hynrei kane ka dei ka dak jong ka jingiatylli kane kan dei ka nuksa ia kiwei pat” ka la ong. Ka kong Teilinia ka la ong ba da ka jingiatreilang bad u MLA kan lah ban pynbor ia ka sorkar ban mynjur ia ki Bill jong ka district Council kiba la shu sahteng naduh mynshuwa.
Ka la pyntikna ruh ba mynta ka kynti kan jop da kaba suk namarba ki paidbah ki la iohi ia ki jingtrei jong ka ha kine ki 10 snem ba ka la long kum ka MDC. “Nga la trei bad nga la leh bha ha kine ki 10 snem, nga ngeit ba u paidbah un ai biang ia nga ka jingjop”, ong ka kong Teilinia. Haba phai pat sha ka mat MUDA ka la ong ba ka sorkar ka la weng noh ia ka jingtreikam jong ka MUDA hapoh u pud u sam jong ka District Council hynrei halor ka jingkynthoh jong u bah Shylla pat ka la ong ba dei ka jingkren jong u hi shimet bad lada wan ka EC kaba thymmai kin pynbeit ia baroh ki jingdonkam. Ka la pynpaw ba ki kam kiba ki MDC kin hap ban peit ki long ka khyndew ka shyiap, ka riti ka dustur, ka synshar khadar.
Phi don ban ong eiei?