‘Nga la duh sa uwei u kpa’, ong u Conrad da ka ‘jingjaw um mat’

Shillong: Ia ka met jong u Lamphang ka iing dorbar u Dr Donkupar Roy Dkhar la pyndep hapdeng ka jingleh burom ka sorkar jylla ha madan Mawpun, Sohra hapdeng ka jingsakhi ki hajar ki paidbah kynthup ki myntri sorkar, ki ophisar bad kiba ieid ba thoin na kylleng ki jaka bad na ka konstitwensi Shella.

“Ha ka 4 tark Lber 2016, nga la duh ia I pa jong nga (PA Sangma), bad mynta nga sngew ba nga la duh biang ia uwei pat uba long kum u kpa jong nga”, la ong u myntri rangbah ka jylla, u Conrad K Sangma ryngkat ka jingjaw ummat haba kren ha ka jingialang pyndon burom khadduh ia u Lamphang ka iing dorbar u Dr Donkupar Roy uba long ruh u president ka UDP mynta ka sngi.
Haba pynkynmaw ia ka jingiakren khadduh ha hospital ha Delhi, u Conrad ula ong, “U Dr Donkupar ula bat na kti jong nga, bad u kylli, ka long kumno ka jinglong jingman ha jylla, kumno ki paidbah ka jylla, ha kane ka por ngam nang ban ong eiei”, la ong u Conrad da ka jingjaw ummat.
“Nga la tip bad ioh jinghikai shibun na u ha ka por ba nga don lang ha ka sorkar”, la ong u myntri rangbah.
U Conrad uba la niew ba u Dr Donkupar u dei kum u kpa u nongialam bad nonghikai ia u ha ka jingsynshar khaddar, u la pynpaw ia ka jingsnewsih bym lah batai shuh ia ka jingkhlad kyndit noh u Dr Donkupar.
Kum u Lamphang ula pyniaid ia ka dorbar kaba ryntih khlem iashah liang iano iano ruh.
U Conrad ula ong ba kum u president u ieng beit ha ka nongrim khlem da shah ia kiwei ban pynkylla da kumwei pat bad ka UDP kala skhem hapoh ka party.
“Nga kynmaw ba wat haba u long myntri rangbah u khot ia ki myntri ban kyrpad ban ai skhim pynroi lem sha ka konstitwensi jong u, bad kane ka dei ka jinglong sngew rit jong u”, la ong u Conrad.
Kum u MLA u ieid eh ia ki paidbah ka konstitwensi, bad kumjuh ia ka jylla.
“Ngi la duh shisha ia u nongialam uba sngew rit bad uba skhem ha ka nongrim”, la ong u Conrad.
Ula ong ba u Dr Donkupar ula pynkynmaw ia u ba ban long u nongialam dei ban ioh ka jingshaniah na ki paidbah bad lada ym ioh ka jingshaniah na ki paidbah, kam long ban dei u nongialam.