Nga la dep risain, ngam dei shuh U President jong ka seng Congress: Rahul

New Delhi: Mynta ka sngi, U Rahul Gandhi, ula kren shai ba um dei shuh U President jong ka seng Congress. “Ka seng, ka dei ban wad ia U President thymmai bad ngam don bynta eiei ha katei ka kam. Nga la dep phah ia ka shithi iehnoh kam jongnga bad ngam dei shuh U President jong ka seng. Ka CWC, ka dei ban khot jingialang kyrkieh bad shim ia ka rai jongka” ong U Rahul ha ki nongthoh khubor ha Parliament.

U MP jong ka Wayanad, ula kren shai, ba un hiar shuki noh, naduh ka 25tarik Jymmang, kaba long ar sngi hadien ka result jong ka elekshon MP bad ki la don shibun kiba kyrpad ba un nym iehnoh ia katei ka kam, hynrei, um shym la sngap satia.

U Gandhi u kren shai ba u shim ia katei ka rai, na ka bynta ba kan don ka jingkhuid ha ka rukom trei kam jong ka seng bad khamtam hadien ba ka Congress, ka la rem jah burom ha ka elekshon Lok Sabbha, kaba dang shu dep. “Nga la dep risain ialade, namar ba nga sngew kit khlieh bad ngam lah ban phah ia kiwei ba kin risain. Ka shong ha ki, lada ki don ka jingsngew kit khlieh” ong shuh U Rahul.