Nga la bat la ka kular bad nga la ïeng rangbah, ong U bah Adelbert

Shillong:U MLA barim ka 17 North Shillong Konstitwensi u Bah Adelbert Nongrum u ong ba u kwah ban pynpaw ïa ka jingsngewnguh naduh ka dohnud jong u bad ban ai khublei kyrpang ïa iwei pa iwei ki nongshong shnong ka Konstitwensi kiba la sei ïa u ban long kum u MLA ha kine ki san snem ba la dep.

“Nga la bat ïa la ka kular bad nga la ïeng rangbah ha ka nongrim. Nga la rung sha ka sorkar hadien ba nga la buh kyndon ïa ka Sorkar da ka issue ban Review bad Revamp ïa ka Reservation Policy, nga la leh ïa kane namar ka jaitbynriew ka kham kordor ban ïa ka shuki ne kano kano ka jingmyntoi ïa nga shimet. Nga la rah ïa kine ki issue ha Ïingdorbar Thaw Aiñ hynrei kaba sngewsih ka long ba ngam shym la ïoh jingkyrshan na ki para MLA ki ba kloi ban ieh ïa la ka shuki bad pynthylli ïa ka Ïingdorbar Thaw aiñ haduh ba ngan da sah marwei bad shahrem ha kine ki mat,” ong u Bah Adelbert Nongrum haba kren bad ki lad pathai khubor.

U la bynrap ruh da kaba ong, “Hynrei ïa ka age relaxation nga la lah ban pynurlong hadien ka jingïakhih ba san sngi ha madan Malki ïa kaba ka jingmyntoi ka long na ka bynta ka State jong ngi hi baroh kawei ym tang ïa ka Constituency. Nga la ïeng rangbah ruh ban pyrshah bad pynbor ïa ka Sorkar ban pynduh bad pyndam noh ïa ka aiñ Casino kaba long ka jingma na ka bynta ki khun samla ka ri jong ngi bad ki pateng ban wan. Nga la rah ruh ïa ka issue TDS (Tax Deduction at Source) ban pyllait ïa ki trai ri trai muluk na ka jingshah ot Income Tax ha ki Bank. Hynrei ka Meghalaya Agricultural Land Bill & ka Meghalaya Compulsory Registration of Marriage Act (as an official document for different purposes) ka shah rem noh namar ba ym don ba kyrshan,” ong u Bah Adelbert haba kren sha ki lad pathai khubor.

U la ong ruh ba ha kine ki san snem ba la leit la ïohi bun ki jingïakhih kum ka Them Metor, CAB, CAA, ILP bad arsnem ka Covid-19 nalor ka kynrum kynram ha ka seng barim ka KHNAM.
“Nga la ïeng skhem bad ngam shym la ïapeiñ ïa ka lawei ki longdien na ka bynta ka shuki ne ka pisa. Nga la pyndonkam hok ruh ïa baroh ki Scheme ba ka Sorkar ka la ai bad nga la pyrshang ban ïarap ïa baroh ki shnong ha kiba bun ki liang katkum ba la maitphang da ki Dorbar Shnong bad ki committee bad kumjuh ïa ki riewshimet ruh katkum i bor barit jong nga. Wat hapdeng kine baroh nga la trei shitom ruh ban pyndep ïa ka Graduation (Bachelor of Arts) jong nga ha u snem 2018-2019,” u la ong.

U la bynrap ruh da kaba ong, “Mynta ka kynti nga wan biang shaphi ki para doh para snam ban kyrpad bad ban pan ïa ka jingkyrshan ba pura ban ailad biang ïa nga ban mihkhmat ïaphi kum u MLA ka 17- North Shillong sha ka Ïingdorbar thaw aiñ ba thymmai. Nga ieng na ka party VPP ka (Voice of the People Party) kaba don ïa ka shap jong U PRAH namarba kane ka party kadon ïa ka jingïohi jngai khamtam na ka bynta ki khun samla bad kaba kongsan eh ka long ba kane ka party ka don ïa ka jingthmu ban wanrah ïa ka synshar khadar kaba khuid ba suba hapoh ka jingïalam jong u President rangbah ka seng u Bah Ardent M Basaïawmoit. Nga dei u samla-rangbah uba la kha la pun ha kane ka konstitwensi bad nga sngew ba ka dei ka kamram jong nga ban ïarap ban kit ban bah lem ïa ka khia ka shon jong phi iwei pa iwei da ka met bad ka mynsiem, da ki kam bad khamtam da kaba rah ïa ka sur jongphi hangtei ha Ïingdorbar thaw aiñ.”

“Nga kwah ban kyrpad rit ïaphi ki hynmen ki para ban sngewthuh ïa ka jingdonkam ban leit bad ban thep ïa la ka vote bad ban jied ïa u nongmihkhmat u ban shakri ïaphi u paitbah, uba don ka jingkitkhlieh na ka bynta ka lawei bad ka pateng ban wan ym u ban shakri tang ïalade shimet. Nga don ka jingkyrmen baskhem ba phin ai ïa kane ka lad ba ngan trei biang na ka bynta jongphi bad ka jaitbynriew hi baroh kawei ba ngan pyndep ïa ki kam kiba dang sah bad ba ngan ïalam ruh ïa ka Constituency, ka Ri bad ka State jongngi hi baroh kawei na ka lawei babha sha ka lawei kaba khambha,” u la ong.
U la bynrap ruh da kaba ong, “Nga panmab sngewrit naphi bad nga sngewsih shisha naduh ka mynsiem ba ngam shym la lah ban pyndep ban wan ïaid ïing ha ki katto katne tylli ki longïing namar ba la khim palat ka por. Nga kyrmen ba phin ïa mab bad sngewthuh lem ia kane ka jingeh. Na ka liang jong nga, nga kwah ban kular tang kane kawei ba ngan ym pynlehnohei ne pyndonkam bakla ïa ka jingpynkup bor jongphi ïa nga kum uta u MLA, hynrei nga kular ba ngan trei shitom met bad mynsiem bad ban bat ïa la ka juban lak haduh ka sngi ba khatduh,” u la ong.