“Nga kwah ban long U Syiem, katba nga dang im ha sla pyrthei”

Shillong,22 Iaiong:
Tang mar ia shong ha ka khet Syiem jong ka Hima Mylliem hadien ba la pynkupbor ia u kum u Acting Syiem u Pa’iem Ricky Nelson Syiem u la ong, “Ngam kwah ban long u Syiem uba tang shisnem ar snem lane tang katto katne bnai, hynrei nga kwah ban long u Syiem katba nga dang im ha sla pyrthei na kata ka daw nga hap ban bud beit bud ryntih ia ki kyndon ki aiñ ba la buh bad nga sngewthuh ba  lada ngam leh kumta ngan ym lah ban neh slem” ong u Acting Syiem ka Hima Mylliem u Pa’iem Ricky Nelson Syiem hadien ba la leit ban shimti ia ka khet kaba la ju shong da u Pa’iem Latho Manik Syiem uba la shah sospon noh ha ka KHADC.
U Pa’iem Ricky u la ong ba ka hima Mylliem ka dei ka hima kaba la jot la pra,kumba ka long mynta bad dei na kata ka daw u la mih shakhmat ha ki snem ba la dep ban ia khun da ka elekshon ha ka jingjied Syiem, “Hynrei u Blei um pat ibit ia nga ha kato ka por, mynta u la ibit ba ngan shimti ia katei ka khet bad ngan pyniaid beit iaid ryntih ia baroh ki kam ka hima bad ngan wanrah biang ia ka nam ka burom ka hima Mylliem kaba la duhnoh kaba long ruh u klongsnam jong ka Ri Khasi” ong u Pa’iem Ricky haba ia kren bad ki nongthohkhubor.
U la ong biang hapoh ka jingpeit jong u kum u khlieh jong katei ka hima un pynthikna ba kan don ka jingiatreilang hapdeng baroh ki bakhraw jong ka Hima kumno ban saiñdur thymmai bad ban pynbeit ia ki jyrwit jyrwat ha katei ka hima, “Ka jingiaid lynti hapoh ka hima ka lalong kaba saphred, kam don shuh ka krukom treikam kaba khuid kaba ia sngewthuh jingmut lang , nga sngewnguh ia ka KHADC kaba la ai ia ka bishar hok ban pynbeit biang ia ki kynrum kynram ka hima Mylliem”.
Haba kylli kaei kaba un leh halor ki ishu kiba ki myntri kiba don lang bad u ki ju ia khih kum ka jingai lum jingtep kiba ki la kynnoh ba ka dei ka jingleh khlem ka jingtip ka hima. “Mynta nga dang shu shimti ia kane ka khet ngin dang hap ban ia kynduh bad phi na ka por sha ka por, ngan ym pat kren eiei ngin sa ia kren kham hadien” u la ong ba ka Hima kan dang hap ban peit bniah bin pa bin ia ki kot ki sla baroh kiba ia dei bad katei ka kam. La kylli biang hato hapoh ka jinglong Syiem jong u un khot ia treilang ia kiwei pat ki myntri kiba ju don ha ka liang u Pa’iem Latho baroh shi katta, “Ka jingkhang ka plie rynghang ia baroh, wan shakhmat ngin ia treilang na ka bynta ka jingbit jingbiang ka Hima” u la pynkut.
Lah ban kdew ba mynta ka step ka KHADC ka la pynmih ia ka hukum ba la sospon noh ia u Pa’iem Latho Manik Syiem bad ha kajuh ka por katei ka hukum ka la pynbna ba la thung ia u Ricky Nelson Syiem kum u Acting Syiem katei ka Hima. Hadien ba la ioh ia katei ka hukum mynta ka step ki myntri,kiba khraw ka Hima Mylliem ryngkat ki bahaing hasem jong ki ki la ap shriak ha ing Dorbar ka Hima Mylliem ban pdiang burom ia u Pa’iem Ricky bad ban leit on ia u shaduh ka khet Syiem.