Nga kob ia U Mukul Sangma, ban ia tainia, ong U Nalin Kohli

Shillong, 31 Jymmang:
“Nga kob ia U Mukul Sangma ban ia tainia halor ka roi ka par jong ka Meghalaya” ong U Nalin Kohli General Secretery jong ka seng BJP, uba dei peit ia ka Meghalaya, mynta ka sngi ha ka jingpdiang sngewbha ia U Manas Choudhury sha katei ka seng, ha ka jingialang kaba long ha Rilbong.
U Kohli, u la kynnoh tyngeh ruh ia ka Congress, na bynta ki jingsahdien jong ka Jylla, ha ka jinglong ki surok, ka jingsahteng ka jingtei ia ka iing dorbar Jylla bad ka jing pynsaphred ia ki khana thok, halor ka bam doh masi, ha kaba u ong ba katei ka dei ka ain, kaba la thaw hi, da ka seng Congress bad ba ka ain khang bam doh masi, ka dei ka ain jong ka sorkar Jylla bad kam dei satia, ka sorkar India, ka ban pyntreikam.
U Manas Choudhury, MLA barim jong ka Mawprem, haba kren ha ka jingialang, u la ong “Nga sngew tynnad ba nga ioh ban ia treilang bad ka kynhun jong ki Sevak, ha kaba u myntri rangbahduh, ula ong ba u dei U Pradhan Sevak”. U Manas, u ong shuh ba u snem 2018, u dei ban long u snem jong ka kylla, ha shwa ba ka Meghalaya, kan rakhe ia ka jingdap 50snem jongka bad ula ong ruh ba ka Meghalaya, kam long ban ha kane ka dur, ha kaba ka jingkitkhlieh jong ki nongialam ka long kaba tlot shabar palat bad u ong shuh shuh “Ka Meghalaya, ka dei ban duh noh na ka jingbamsap bad ka dei ban duh noh na ka jingim jaipdeh kaba ju long baroh shi katta”.
U Bah Sounder Cajee, haba kren ka jingialang, ula ong “Nga la ong ia U Manas, ngi ia dei shi para bad ngin ia trei lang ryngkat ryngkat” bad ula ong shuh shuh, ba ka por ka la dei ba ka Shillong South Constituency, ka dei ban kylla noh, ha kaba u ong ruh ba ka NCP, kaba dei ka seng kaba iatreilang bad ka Congress, lane kaba u ong Nei Chaye Party (NCP). U bah Sound, ula ong shuh shuh ka 2018, ka dei ban long ka bym don Congres shuh, ha kaba u ong “Congress rah noh la ki tum ki tam bad mih noh shi syndon”.