Nga kloi ban shong noh bad ailad ia U Bah Ardent ha ka 2018:HS Shylla

Shillong, 18 Jymmang:
“Nga kloi ban shong noh bad ailad ia U President jong ka seng HSPDP bad ban trei shitom ba un jop ha ka 2018” ong ka kyrwoh na U bah HS Shylla MDC ka Nongkrem, uba dei na ka seng UDP.
U Bah Shylla, ula ai jingkhein ia ki Vote jong ki ar tylli ki seng, kumba ka paw ha ka elekshon MDC ba dang shu dep, ha kaba ula pyni ba ka seng UDP, ka ioh 6097 vote, katba ka HSPDP, ka ioh 4122 vote bad ka kyrwoh ka ong shuh “Na ka bynta ka Ri bad ka Jaidbynriew, nga kloi ban shong noh”, ong U Bah Shylla.
U MDC jong ka seng UDP, ula ong shuh ba ki Seng Riewlum baroh lai tylli, kynthup ia ka KHNAM, UDP bad HSPDP, ki long kiba tlot ba swai, la kumba kin duh kin dam noh bad nangta ki National Party baroh ar tylli ruh ki don ha ka juh hi ka kyrdan jong ka jingtlot, ha kaba ula ong ba ka Congress kaba ki paidbah ki la ieit la shaniah bha, mynta kan ioh thiah shwa noh shipor bad ka BJP kaba la khie rasong mynta ha kylleng ka Ri India kan dang synshar ia ka Ri India bun snem, hynrei hangne ha Meghalaya kane ka seng kam pat dei ban kyrkieh hynrei kan ap sa khyndiat por, ai ba kan suhthied bha kumba la suhthied ka Seng Congress haduh ba u paidbah un da pdiang da kaba suk mynsiem, namar tang ha ka snem 2019 la dei ban jied ia u MP sha Lok Sabha.
“Ha kaba ia dei bad ka PDF nga ieh ha ka jingstad jong kitei ki Seng Riewlum lai tylli ban pyrkhat kumno ban leh namar kumba ka long mynta kam pat paw ka dur ba shisha jong ka, na ka liang jong nga ngam don ei ei ban ong, ka shong ha ka jingiarai lang jong ki Seng Riewlum (UDP, HSPDP, KHNAM). Tang kawei kaba donkam ka long ba nangne sha khmat ngin ym pharia shuh ia ka jaidbynriew da kaba pynmih bun tylli ki Seng Riewlum” ong shuh U bah Shylla.
U Bah Shylla, u la ai jingmut namarkata ia ki nongialam jong ki Seng Riewlum baroh lai tylli ba ki dei ban ia kynduh noh mar mar khlem da pynslem bad shim noh ia ka rai ban iatreilang shwa ka elekshon. Kaba kongsan eh kum ha kane ka por ka dei ka jinglong la kloi jong ki Rangbah bad ki Longkmie lane ki Samla baroh kiba la pynkhreh ban ialeh ia ka elekshon na kine ki lai tylli ki Seng Riewlum ba kin hap ban ailad ia kane ka jingiatrei-lang ka bym bit duh jong kine ki Seng Riewlum naka bynta ka daw bah daw san jong ka Ri bad ka Jaidbynriew namar mynta ka dei ka lad kaba khadduh ia ki Seng Riewlum ban ioh ka lad ban ai ia ka jingshakri kaba kum ka jaidbynriew ka donkam kyrkieh, pynkut ka kyrwoh.